Almatyda polıtseıler kólik urysyn 7 mınýttyń ishinde quryqtady
ALMATY. 23 qarasha. QazAqparat /Erlik Erjanuly/ - Almatyda ońaı oljaǵa kenelmek bolǵan kólik urysy ustaldy. Esh jerde jumys istemeıtin 24 jastaǵy bul azamat Túrksib aýdanynda Aqan seri kóshesiniń boıyndaǵy úılerdiń biriniń aýlasynda turǵan «Deý Neksıa» markili mashıneni aıdap áketýdi oılastyrǵan.
«Ol kólik esigin ashýda súımendi paıdalanǵan. Avtomobıldiń dabyl qaqqyshpen jabdyqtalmaýy onyń jumysyn jeńildetken. Alaıda kórshi aýladan shyqqan shýdy estip, bul urlyqty baıqap qalǵan bir azamat kúdikti jóninde Jedel basqarý ortalyǵynyń operatoryna habarlaıdy. Jaqyn mańda qyzmetin atqaryp júrgen patrýldik ekıpaj oqıǵa ornyna jedel jetip, kólik ıesinen jaýap alǵannan keıin, polıtsııanyń barlyq narıadtaryna aıdap áketilgen kólik týraly tuspaldy baǵdar beredi. Ol óz nátıjesin berdi», - deıdi qalalyq ishki ister departamenti Jol polıtsııasy basqarmasynyń bastyǵy Arman Sarbasov. Onyń aıtýynsha, jol polıtsııasynyń ekıpajy izdeýdegi avtokólikti Jumabaev kóshesiniń boıynan baıqap qalady. Olardy kórgen ury kóliktiń jyldamdyǵyn arttyryp qashyp ketýge áreket jasaǵanymen iz kesýshilerden qutyla almady. Behterev kóshesimen qıylysta jol polıtsııasy basqarmasynyń narıadtary onyń jolyna tosqaýyl qoıady.
«Kúdikti azamat óz qylmysyn birden moıyndady. Óziniń alǵashqy ret zańdy buzǵanyn, buryn eshqashan qylmystyq jaýapkershilikke tartylmaǵanyn aıtyp aqtalýǵa tyrysady. Tergeý kezinde onyń birneshe jyl tehnıkalyq jóndeý ortalyǵynda jumys istegeni anyqtaldy. Ol óziniń eptiligin paıdalanyp, kólik qorabynyń agregattyq derekterin joıyp, qaıta satýdy josparlaýy múmkin. Biraq bul tek boljamdardyń biri ǵana. Qylmystyń tolyq mán-jaıy tergeý kezinde anyqtalatyn bolady», - dedi polkovnık A.Sarbasov.
