Almatyda polıtseıler qaqqan áıel aýyr halde jatyr
ALMATY. QazAqparat – Almatyda polıtsııa kóligi qaǵyp ketken áıeldiń qazirgi jaǵdaıy týraly dárigerler aıtyp berdi, dep habarlaıdy QazAqparat tilshisi.
Qalalyq Qoǵamdyq densaýlyq basqarmasynyń baspasóz qyzmeti habarlaǵandaı, áıel Shuǵyl medıtsınalyq kómek kórsetý aýrýhanasyna jetkizilgen.
«Patsıent jabyq mı jaraqatymen, mıy shaıqalyp, sol jaq ıyǵy men jilinshigi synyp túsken. Qazir jansaqtaý bóliminde jatyr. Dárigerler onyń jaǵdaıyn turaqty ári aýyr dep baǵalap otyr», - dedi baspasóz qyzmeti.
Aıta ketý kerek, jol apaty tańerteń Almaly aýdanynda bolǵan.
Qalalyq polıtsııa departamentiniń baspasóz qyzmeti habarlaǵandaı, áıel Tóle bı kóshesiniń tyıym salynǵan tusynan joldy kesip ótpek bolǵan. Sol maqsatpen ol avtobýstyń artynan júgirip shyqqan. Bul sátte Tóle bı kóshesimen batysqa bet túzep kele jatqan Hıýndaı markaly polıtsııa kóligi ony qaǵyp ketken.
