Almatyda polıtseıler dárethana shuńqyrynan jańa týǵan náresteni alyp shyqty
ALMATY. QazAqparat – Almatylyq polıtseıler dárethanada qaldyrylǵan jańa týǵan náresteni qutqaryp qaldy, dep habarlaıdy QazAqparat tilshisi.
Almaty qalalyq polıtsııa departamentiniń málimetinshe, túnde qalanyń Túrksib aýdanynda jańa týǵan náresteni qutqarýǵa arnalǵan arnaıy is-shara ótti. Túrksib aýdandyq polıtsııa basqarmasynyń kámeletke tolmaǵandar isi jónindegi ýchaskelik ınspektory Nurjan Shatýnovtyń aıtýynsha, saǵat ekide kámeletke tolmaǵan qyzdyń túsik tastaǵandyǵy týraly habar berilgen. Onyń qaladaǵy aýrýhanalardyń birine jatqyzylǵany belgili boldy.
«Dárigerlermen sóıleskennen keıin oqıǵa ornyna baryp, tekserýdi jón kórdim. Basyma «bala qaıda?» degen suraq keldi. Qyzdyń anasynan oqıǵaǵa deıin onyń syrttaǵy dárethanada biraz ýaqyt bolǵanyn bildim. Dárethana ishinen qan izderin taýyp, ishinde jatqan balany kórdim. Ol tynys alyp jatty. Osy kezde jedel tergeý toby keldi, onyń quramynda krımınaldyq polıtsııa bóliminiń jedel ýákili Ǵazız Hamasqalıev boldy. Dárethananyń edeninen taqtaılardy tez alyp tastadyq. Áriptesim Ǵazız tómenge túsip, balany qyzmettik kóılegine orap, abaılap shyǵaryp aldy», - dedi Nurjan Shatýnov.
Al, 17 jasar qyzdyń anasy onyń júkti bolǵanyn bilmegenin aıtqan. Qazirgi ýaqytta bul derek boıynsha Túrksib aýdandyq PB-na qarasty polıtsııa bóliminde tergeý amaldary bastaldy.
«Qazir balanyń jaǵdaıyn bilip qaıttyq. Ol dárigerlerdiń baqylaýynda, jansaqtaý bóliminde jatyr. Óz betinshe demalyp jatyr – bul jańalyqqa balany qutqarýǵa qatysqan barlyq áriptesterim qatty qýandy. Demek, bala ómir súredi. Ol týǵannan óz ómiri úshin kúresti. Oǵan zor densaýlyq, uzaq ǵumyr tileımiz. Baqytty bolyp óse bersin. Men úsh uldyń ákesimin. Sondyqtan, bul oqıǵa meni beıjaı qaldyrmady. Biz óz áriptesterimizben birge qutqarylǵan náresteniń taǵdyryn mindetti túrde qadaǵalaımyz jáne múmkindiginshe oǵan qatysymyz da bolady», - dedi Nurjan Shatýnov.
Foto: polisia.kz
