Almatyda polıtseıler 8,5 keliden astam esirtki tárkiledi

ALMATY. QazAqparat - Almatyda polıtseıler bes er adamnan 8,5 keli esirtki tárkiledi, dep habarlaıdy QazAqparat tilshisi.

Almaty qalasynyń tártip saqshylary marıhýana satýmen aınalysqan topty ustady. Qylmystyq top 35 pen 52 jas aralyǵyndaǵy bes adamnan quralǵan. Bári Almaty oblysynyń turǵyny. Negizgi tulǵa – 1983 jyly týǵan D.esimdi azamat.

«Jedel jáne arnaıy is-sharalar nátıjesinde kúdiktilerdiń qylmystyq áreketi dáleldendi. Anyqtalǵandaı, esirtki zattary – marıhýana jáne asa iri mólsherdegi gashıshty D.esimdi azamat Jambyl oblysynan jetkizedi. Kúdikti mingen «Mersedes» kóligin arnaıy jasaq bóliminiń qyzmetkerleri «Daraboz» yqshamaýdanynda toqtatty. Kólikti jáne kúdiktilerdiń turǵylyqty jerin tintý barysynda 8,5 keliden astam esirtki tabyldy jáne tárkilendi. Atap aıtqanda, «gashısh» – 4 keli 216,13 gr. jáne «marıhýana» – 4 keli 361,01 gr», - dedi Almaty qalalyq PD Esirtki qylmysyna qarsy kúres basqarmasynyń bastyǵy Erlan Álmaǵambetov.

Sonymen qatar spıker, qylmystyq kásipti uıymdastyrýshyǵa tıesili úıde úsh qarý tabylǵanyn málim etti.

«Qarýdyń ekeýi Jambyl oblysynda urlanǵany belgili boldy. Taǵy bir qarýdyń kimge tıesili ekendigi tergeý taǵaıyndaǵan sot-ballıstıka saraptamasy anyqtaıdy. Sotqa deıingi tergeýdiń biryńǵaı tizilimine esirtkini zańsyz satý jáne atys qarýyn zańsyz saqtaý faktisi boıynsha birden eki qylmystyq is tirkeldi», - dedi polıtsııa ókili.

Kúdiktiler PD ýaqytsha ustaý ızolıatoryna qamaldy.