Almatyda polıtseıler 7-qabattan sekirmek bolǵan áıeldi qutqardy
ALMATY. QazAqparat - Almatyda polıtseıler 7-qabattan sekirmekke árekettengen áıeldi qutqardy, dep habarlaıdy QazAqparat tilshisi.
Qalalyq ІІD baspasóz qyzmetiniń habarlaýynsha, 102 kezekshi nómirine Almaly aýdanyndaǵy kópqabatty úı turǵyndary habarlasqan.
Olar 7-qabattan áıel adam sekirmek bolyp jatqanyn aıtty.
Oqıǵa ornyna «Býran - 075» ekıpajy jedel jiberildi.
«Polıtsııa leıtenanty Erkebulan Qarjaýbaev pen aǵa serjant Dýman Qýatbekov oqıǵa ornynda shuǵyl áreket etýi kerek boldy. Olar kórshi páter arqyly kirip, kórshiles balkon arqyly áıelmen tildespek bolǵan. Alaıda, ol polıtsııanyń sózin qulaqqa ilmegen», - dedi jergilikti polıtsııa qyzmetiniń jol-patrýl polki komandıriniń orynbasary Manap Sattarov.
Tártip saqshylary tildesýden túk shyqpaǵan soń basqa áreketke kóshken.
«Biz bir qabatqa joǵary kóterildik. TJD mamandary maǵan saqtandyrý beldigin taǵyp berdi. Jospar boıynsha men 8 qabattan 7-qabatqa túsip, belbeý arqyly páterge kirýim kerek edi. Al meniń áriptesterim sol kezde áıeldiń nazaryn ózine aýdarý úshin páterdiń qońyraýyn basty. Áıel sol kezde terezeden ary qaraı ketken kezde men ishke kirdim. Ol terezege qaıta júgire bastady. Men tynyshtandyrýǵa tyrystym. Áıeldiń óte qatty kúızeliste ekendigi baıqaldy. Esik ashylǵan kezde ar jaǵynda polıtsııa men medıtsınalyq qyzmetkerleri oǵan kómek kórsetti», - dedi leıtenant Qarjaýbaev.
Polkovnık Sattarovtyń aıtýynsha, bul almatylyq polıtsııanyń kúndelikti jumysynyń bir kórinisi ǵana.
«Belgili bolǵandaı, 37 jastaǵy áıel psıho-nevrologııalyq dıspanserde esepte tur. Qazir oǵan psıhologııalyq kómek kórsetilip jatyr», - dedi Manap Satarov.
