Almatyda polıtseıler 190 kelige jýyq esirtki tárkiledi
Jyl basynan beri Almaty polıtsııasy 252 esirtki qylmysyn anyqtady. Onyń 87-si esirkini saýdalaýmen baılanysty. Zańsyz aınalymnan 188 keliden astam esirtki: onyń ishinde 30 keli marıhýana, 29 keli gashısh jáne 400 gramǵa jýyq geroın alyndy.
«Qazirgi ýaqytta jastar arasynda keńinen taralǵan sıntetıkalyq esirtkini anyqtaý jáne jolyn kesý boıynsha arnaıy jumystar júrgizilip jatyr. Shara barysynda qylmystyq áreketti júzege asyratyn dılerlerdi ustaý, esirtki satýǵa arnalǵan resýrstardy anyqtaý maqsatynda ǵalamtor keńistigi baqylaýǵa alyndy», – deıdi Esirtki qylmysyna qarsy kúres basqarmasynyń bastyǵy Erlan Almaǵambetov.
Sonymen qatar, ol Almatyda esirtki daıyndaıtyn zerthananyń anyqtalǵanyn atap ótti.
«Júrgizilgen sharalardyń arqasynda esirtki jasaıtyn zerthana anyqtaldy. Osy qylmysqa qatysy bar eki er adam ustaldy. Olar – 1994 jyly týǵan Q. jáne N. esimdi azamattar. Zerthanany tekserý barysynda ártúrli suıyq zattar tabyldy. Sonymen qatar, jalpy salmaǵy 25 keliden asatyn sıntetıkalyq esirtki men 75 keli prekýrsor tárkilendi»,– deıdi E.Almaǵambetov.
Qazirgi ýaqytta, kúdiktiler Almaty qalalyq Polıtsııa departamentiniń ýaqytsha ustaý ızolıatoryna qamaldy. Sotqa deıingi tergeý júrip jatyr.