Almatyda polıtseıdi kóliginiń esigine baılap súıregen júrgizýshi ustaldy
ALMATY. QazAqparat - Almatyda polıtseıdi kóliginiń esigine baılap súıregen júrgizýshi ustaldy. Oqys oqıǵanyń vıdeosy áleýmettik jelige tarady, dep habarlaıdy QazAqparat tilshisi.
Oqys oqıǵa 11 tamyz kúni 16:00-de Almatynyń Medeý aýdanynda bolǵan. «Luxgen-7» markaly avtomobıldiń júrgizýshisi jol erejesin buzǵany úshin toqtatylǵan. Polıtseıdiń qujatyn talap etkenine pysqyrmaı, ol oqıǵa ornyna izin sýytpaq bolǵan.
«Júrgizýshi patrýl qyzmetkeriniń kóliktiń esigine ilinip qalǵanyna da pysqyrmaǵan. Qaıta gazyn basyp, ony ary ıtere bastaǵan. Oqıǵa saldarynan polıtsııa serjanty Rýslan Muqashevtyń oń ıyǵy synyp, eńbek súıeginiń oń jaǵy gematoma bolǵan. Abyroı bolǵanda, qazir ómirine qaýip tónip turǵan joq. Ol aýrýhanaǵa jatqyzyldy. Іzdestirý bólimi kúdiktiniń tulǵasyn birden anyqtady. Ol 1981 jyly týǵan azamat I. Keshe keshkisin ol ustaldy», - dep málimdedi Almaty polıtsııa departamentiniń jergilikti polıtsııa qyzmeti basqarmasy bastyǵynyń orynbasary polıtsııa podpolkovnıgi Erik Nasyrbekov.
Er adamǵa birneshe bap boıynsha aıyp taǵylyp otyr: QR Qylmystyq Kodeksiniń 345-babynyń 1-bóligi (Avtomobıldi, trolleıbýsty, tramvaıdy ne basqa da mehanıkalyq kólik quralyn basqaratyn adamnyń jol júrisi nemese kólik quraldaryn paıdalaný qaǵıdalaryn abaısyzda adamnyń densaýlyǵyna aýyrlyǵy ortasha zııan keltirýge ákep soqqan buzýy); QR Qylmystyq kodeksiniń 380-babynyń 2-bóligi (Bılik ókiline qatysty kúsh qoldaný); QR Ákimshilik quqyq buzýshylyq týraly kodeksiniń 612-babynyń 1-bóligi (Qujattary joq jáne basqarý quqyǵy joq adamnyń kólik quralyn basqarýy).
Avtor: Elaman Turysbekov
