Almatyda polıtseıdi qaǵyp óltirgen júrgizýshi sottaldy
ALMATY. QazAqparat - Almatyda №2 Jetisý aýdandyq soty arnaıy jasaq ulanyn qaǵyp óltirgen júrgizýshige qatysty úkim shyǵardy, dep habarlaıdy QazAqparat tilshisi.
Jol apat Almaty-Qapshaǵaı tas jolynda bolǵan edi.
«Raqymjan Esenbaevty aıypty dep taýyp, 2 jyl 6 aıǵa bas bostandyǵynan aıyrý týraly úkim shyǵaramyn. Sottalýshy jazasyn qaýipsizdik dárejesi jeńil túzeý mekemesinde ótesin», - dedi úkimdi oqyǵan sýdıa Elmahan Dildábaev.
Sýdıa júk kóliginiń ıesinen 3,1 mln teńge kóleminde materıaldyq shyǵyn, 3 mln kóleminde moraldyq shyǵyn óndirý týraly sheshim shyǵardy.
Esenbaev sot zalynda qamaýǵa alyndy.
Aıta ketý kerek, «MAZ-642208» júrgizýshisi Almaty Qapshaǵaı tas jolynyń 3-shaqyrymynda rólden aırylyp qalyp jol shetindegi polıtseıdi qaǵyp ketken bolatyn. Jandos Nurǵazıev «Nura» beketinde turǵan. Arnaıy jasaq ınspektory alǵan jaraqatynan sol jerde kóz jumdy. Marqumnyń artynda eki qyzy men júkti kelinshegi qaldy.
