Almatyda polıtseı uıqydaǵy adamdy órtenip jatqan qonaq úıden alyp shyqty
ALMATY. QazAqparat - Almatyda polıtsııa qyzmetkeri órtengen qonaq úıden uıyqtap jatqan adamdy aman alyp shyqty, dep habarlaıdy QazAqparat tilshisi.
Keshe saǵat 22.30 shamasynda Alataý aýdanyndaǵy Shosseınaıa kóshesindegi qonaq úı kesheninen órt shyqqan.
«Qolastymda qyzmet etetin qyzmetkerlerim maǵan qońyraý shalyp, qonaq úı órtenip jatqanyn habarlady. Men jumysqa tez keldim, arnaıy qyzmet ókilderi shaqyryldy. Osyǵan oraı erekshe rızashylyǵymdy bildirgim keledi. Keshe kóshede ótip bara jatqan jigit bólmede uıyqtap jatqan jas jigitti qutqaryp, óz ómirin qaterge tikti. Keıin belgili bolǵandaı, bul – Alataý aýdanynyń polıtsııa qyzmetkeri eken», – dedi qonaq úı kesheniniń ıesi.
Áńgime Alataý aýdany PB bastyǵynyń orynbasary Janserik Myńjasarov týraly bolyp otyr.
Órt shyqqan kezde ol Shańyraq shaǵynaýdanyna kezekshiligine bara jatqan.
«Men Soltústik aınalma kóshesimen ońtústik baǵytta kele jattym. Qonaqúıden shyǵyp jatqan tútindi kórdim. Dereý kóligimdi qoıa salyp júgirdim. Ǵımarattyń aldynda 10 shaqty adam boldy. Men ákimshiden «ishinde adamdar bar ma?» dep suradym. Ol 108-bólmede er adam bar ekenin jáne onyń qalyń uıqyda jatqanyn aıtty. Sosyn birden ekinshi qabatqa kóterildim, tútin tym qoıý eken. Esikti syndyrýǵa týra keldi. Amalyn taýyp, álgi adamdy kóshege alyp shyqtym», – deıdi podpolkovnık Myńjasarov.
Qutqarylǵan adam Almatyǵa issaparmen kelgen. Ol ómirin qutqarǵan polıtseıge alǵysyn aıtty.
