Almatyda polıtseı men feldsher janyp jatqan úıden áıeldi qutqaryp qaldy
ALMATY. QazAqparat- Almatyda polıtseı men feldsher janyp jatqan úıden áıeldi qutqaryp qaldy, dep habarlaıdy QazAqparat tilshisi.
Almaty qalalyq tótenshe jaǵdaılar departamentiniń málimetinshe, 18 jeltoqsan kúni tańǵy saǵat 10:24 kezinde «101» pýltine Medeý aýdany, Ahmedsafın kóshesinde ornalasqan № 8-úıdiń órtenip jatqany týraly habar kelip tústi.
«Oqıǵa ornyna 6 mınýtta jetken órt sóndirýshiler, úıdiń shatyry men tóbe jabyndysynyń janyp jatqanyn anyqtady. Jalyn 120 sharshy metr aýmaqty sharpyǵan. Órt 23 mınýt ishinde oqshaýlanyp, 11:15-te tolyǵymen joıyldy. Órtpen kúres mamandary kórshi turǵyn úıdi órtten qorǵap qaldy. Órtti joıýǵa TJD quramynan - 30 qyzmetker, 6 birlik tehnıka jáne qalanyń ózara is-qımyl qyzmeti jumyldyryldy»,- habarlady Almaty qalalyq Tótenshe jaǵdaılar departamentinen.
Vedomstvo málimetinshe, «Býran-240» ekıpajynyń patrýldik polıtsııa polkiniń aǵa ınspektory Baǵdat Baqytjanuly Áshekov pen JMK № 10 stantsııasynyń feldsheri Tahır Rýzemov órt sóndirý bólimsheleri kelgenge deıin, óz ómiri men densaýlyǵyn qaterge tigip, janyp jatqan úıden aıaǵynyń jaraqatyna baılanysty (otadan keıingi jaǵdaıy) úı-jaıdan óz betinshe shyǵa almaı otyrǵan 31 jastaǵy áıeldi qutqardy.
Qutqarý barysynda, polıtsııa aǵa leıtenanty Baǵdat Ashekov jaraqattandy. Dárigerler tekserip, medıtsınalyq kómek kórsetkennen keıin ol qyzmetine qaıta oraldy.
«Patrýldik polıtsııa polkiniń aǵa ınspektory aǵa leıtenant Baǵdat Baqytjanuly Ashekov pen № 10 JMKQ feldsheri Tahır Rýzemov Almaty qalasy Tótenshe jaǵdaılar departamentiniń basshylyǵymen marapattaýǵa usynylatyn bolady», - dep atap ótti departamenttiń baspasóz qyzmetinen.
