Almatyda polıtseı dúkenshini pyshaqpen shabýyl jasaǵan qaskóıden qutqaryp qaldy
ALMATY. QazAqparat - Almatyda polıtsııa qyzmetkeri satýshyny qarýly qaraqshydan qutqaryp qaldy, dep habarlaıdy «QazAqparat» HAA qalalyq Polıtsııa departamenti baspasóz qyzmetiniń Facebook-tegi paraqshasyna silteme jasap.
Shabýyl nysany qalanyń tómengi bóligindegi R.Zorge kóshesinde ornalasqan shaǵyn azyq-túlik dúkeni boldy. Shamamen keshki saǵat 6 kezinde 28 jastaǵy qaskúnem dúkenge kirip, satýshyny pyshaqpen qorqytyp, aqsha talap etken.
«Dúkenge kelgen kýágerlerdiń biri kóshege shyǵyp úlgerip, mańaıdaǵylardy kómekke shaqyrǵan. Qylmystyq polıtsııa bólimshesiniń qyzmetkeri, polıtsııa aǵa leıtenanty Elmurat Omar jedel oqıǵa ornyna jetken. Ol dál sol ýaqytta dúken mańynda bolǵan. Ol shabýylshynyń art jaǵynan kirip, ony ańdatpaı qolǵa túsirdi. Birer sekýndtan keıin qolyndaǵy pyshaǵyn da alyp úlgerdi. Bul jerde kúdiktini qolǵa túsirýge septigin tıgizgen kýáger qyzdy atap ótken jón. Birinshiden, ol shoshyp óz betimen qashyp ketpeı, kómekke shaqyrdy, artynsha qoryqpastan polıtsııa qyzmetkerimen birge dúkenge kirgen», - dedi Túrkisib aýdandyq polıtsııa basqarmasynyń basshysy, polıtsııa podpolkovnıgi Dýman Aýhadıev.
Kúdikti azamattyń buǵan deıin qaraqshylyq shabýyl boıynsha sotty bolǵany anyqtaldy. Qazir ol qamaýǵa alynyp, qylmystyq jaýapqa tartylýda.
«Eń bastysy qaskóı eshkimdi jaralap úlgermedi. Ol óziniń qylmystyq áreketine kedergi keletinin kútken joq. Dúkenniń ishi tar bolǵandyqtan tóbeles shyǵarý satýshy úshin qaýipsiz boldy, men onyń pyshaq ustaǵan qolyn qursaýlap, pyshaǵyn tartyp aldym. Áriptesterim de ýaqytynda kómekke keldi. Men ózimniń qyzmettik mindetimdi atqardym, báriniń sátti aıaqtalǵanyna qýanyshtymyn», - dedi óz kezeginde aǵa leıtenant E.Omar.
Aıta keteıik, E.Omar 1995 jyly týǵan, 2017 jyly QR ІІM Almaty akademııasyn bitirgen. Eńbek jolyn qylmystyq polıtsııa bólimshesinen bastaǵan.
