Almatyda polıtseı aýǵan soǵysy ardagerin aman alyp qaldy
ALMATY. QazAqparat - Almatylyq polıtseı aýǵan soǵysy ardageriniń ómirin saqtap qaldy, dep habarlaıdy QazAqparat tilshisi.
Demalys kúni «Jańa dáýir» aýylynda turatyn Qasenovter otbasy qonaqtarmen tańǵy as iship otyrǵan kezde kútpegen jaǵdaı bolǵan. Úı ıesi Qanat Qasenov ústel basynda esinen tanyp qalǵan. Sol sátte úıge kelgen qonaqtyń biri ony aman alyp qaldy.
«8:30-da kúıeýim ekeýmiz tańǵy asty isheıin dep otyrǵanbyz, sol kezde tanysymyz Sergeı jáne onyń dosy keldi. Barlyǵy shaı ishýge ústelge jaıǵasty. Bir kezde kúıeýim Qanat tunshyǵyp qalǵandaı bolyp, basyn artqa tastap, beti kógerip, kózderi aınala bastady. Barlyǵymyz eseńgirep qaldyq, men ne isterimdi bilmedim jáne qatty qoryqtym. Osy sátte Baýyrjan esimdi qonaǵymyz ornynan kúıeýime jaqyndap, ústelden qasyqty alyp, aýzyna salyp, tilin shyǵaryp, tynys alý joldaryn bosatty. Sodan keıin onyń arqasynan ura bastady. Osyndaı birneshe áreketten keıin Qanat qalpyna kele bastady. Kóp uzamaı jedel járdem keldi, olar kúıeýimdi tekserip, medıtsınalyq kómek ýaqytynda kórsetilmegende bári qaıǵyly aıaqtalýy múmkin ekenin aıtty», – deıdi Qalıpa Bekpasova.
Qanat Qasenovtyń týystary buǵan deıin mundaı jaǵdaı baıqalmaǵanyn aıtty. 80-jyldardyń basynda Qanat Aýǵanstanda, Kandagar qalasynda qyzmet etken.
Internatsıonalıst jaýyngerdiń balasynyń aıtýynsha, ákesi alkogol nemese zııandy zattarǵa áýes emes.
«Eger Baýyrjan sol kúni bizdiń úıge kelmegende, kúıeýimniń aman qalýy ekitalaı edi. Otbasymyzdyń atynan Baýyrjan Torǵaevqa kúıeýimdi qutqarǵany úshin shyn júrekten alǵys aıtamyz. Almaty qalasy polıtsııa departamentiniń basshylyǵyna júgine otyryp, biz Torǵaev Baýyrjan Bákenulyn laıyqty marapattaıtynyna úmit artamyz. Onyń is-áreketinen biz ishki ister organdary qyzmetkeriniń jarqyn úlgisin kórdik, ol azamattardy qylmyskerlerden qorǵap qana qoımaı, alǵashqy kómek kórsete aldy», – deıdi Qanat Qasenovtiń jubaıy.
