Almatyda pnevmonııamen aýrýhanaǵa túsken naýqastardyń sany 2 ese azaıdy
ALMATY. QazAqparat – Almaty ákimi Baqytjan Saǵyntaev Almaty arnasyndaǵy Akimat Live baǵdarlamasynda pnevmonııamen emhanaǵa túsip jatqan aýrýlardyń sany 2 ese azaıǵanyn aıtty, dep habarlaıdy QazAqparat tilshisi.
Ákimniń sózine sensek, patsıentter sany maýsymda óte kóp bolǵan.
«Osy ýaqyt aralyǵynda 6 175 patsıent pnevmonııadan emdeldi. Eger aýrýdyń órshý kezeńinde kúnine - 300 patsıent aýrýhanaǵa túsken bolsa, búginde táýligine - 133 adam túsip jatyr», - dedi Baqytjan Saǵyntaev.
Shahar basshysy dárigerlermen tikeleı baılanysta otyrǵanyn aıtty.
«Men negizgi aýrýhanalardyń bas dárigerlerimen únemi sóılesip, olardan aýrýhanaǵa túsken adam sanyn surap otyramyn. Máselen, ótkende № 7 aýrýhanaǵa kúnine 100 syrqat pnevmonııamen túsip otyrǵan. Sońǵy ýaqytta táýligine 15-20 adamnan túsip jatyr. № 4 aýrýhana, Shuǵyl medıtsınalyq kómek kórsetý aýrýhanasyna, №1 aýrýhanaǵa jatqyzylǵan patsıentter sany da azaıyp keledi. Baıqaǵanymyzdaı, pnevmonııamen túsken naýqastar sany eki ese azaıǵan», -dedi ákim.
