Almatyda plastıkalyq otadan kóz jumǵan áıeldiń týystary 50 mln teńge talap etti
ALMATY. QazAqparat - Almaly aýdandyq sotynda lıposaktsııadan qaıtys bolǵan Ýkraına azamaty Dana Agamýradovanyń ólimine qatysty sot isi jalǵasýda, dep habarlaıdy QazAqparat tilshisi.
Sot aldynda plastıkalyq hırýrg Dmıtrıı Pısarev jaýap berip jatyr.
Búgin qaıǵyly oqıǵa bolǵan Estetıka ortalyǵynyń bas dırektory Olga Tıýtıýnnıkova sotta jaýap berdi. Áıel ota qoldan quralǵan apparattan jasaldy degen aqparatty joqqa shyǵardy.
«Joǵary sapaly aspırator jyl saıyn tehnıkalyq qyzmet kórsetýden ótedi. Ol mende shamamen 2008 jyldan beri bar. Bul qytaı ónimimen salystyrǵanda anaǵurlym sapaly. Bul quralmen 30-50 ota jasaldy. Ol maıdy jaqsy soryp alady. Maǵan hırýrgtar solaı degen. Bul qoldan jasalǵan apparat emes. Ony ózim jasap shyǵarmadym. Aspırator «Medtehnıkten» satyp alynǵan bolatyn", - dedi Olga Tıýtıýnnıkova.
Olga Tıýtıýnnıkova kinásin moıyndaǵany úshin jáne aryzdyń jaramdylyq merziminiń aıaqtalýyna baılanysty qylmystyq jaýapkershilikten bosatylǵan edi.
Jábirlenýshi tarap 50 mln teńge kóleminde moraldyq shyǵyn óteýdi surap, azamattyq talap aryz berdi. Talapty qaza tapqan qyzdyń sińlisiniń atynan advokat Gúlmıra Buralhıeva oqydy.
«Ápkem qaıtys bolǵan soń jaqyn týysy retinde menen eshkim keshirim suramady. Ápkemniń jerleý rásimine eshqandaı materıaldyq shyǵyn kórsetilmedi. Materıaldyq jaǵdaı bolmaǵandyqtan ol týǵan jerinde emes, Almatyda jerlendi. Moraldyq shyǵyn kólemin 50 mln teńgege baǵalaımyn», - degen talap oqyldy.
Eske salaı keteıik, Dmıtrıı Pısarev QR Qylmystyq kodeksiniń 317-babynyń 3-tarmaǵy (adamnyń qaıtys bolýyna sebep bolǵan medıtsınalyq nemese farmatsevtıkalyq qyzmetkerdiń kásibı mindetterin tıisinshe oryndamaýy) boıynsha aıyptalǵan. Іstiń jaı-japsarymen myna jerden tanysýǵa bolady.
Aıta keteıik, hırýrg aıybyn moıyndamady. Buǵan deıin qylmystyq istiń barysyna zardap shekken taraptyń advokaty pikir bildirgen edi.
