Almatyda pırotehnıkanyń jarylýynan 2 adam jaraqat alǵan
ALMATY. QazAqparat – Almatyda 2019 jyly pırotehnıkany durys paıdalanbaýdan 2 adam zardap shekti. Bul týraly búgin Almaty qalalyq TJD ókilderi ótkizgen brıfıng barysynda aıtyldy, dep habarlaıdy QazAqparat tilshisi.
Jyl saıyn Almatyda 31 jeltoqsannan 5 qańtarǵa deıin orta eseppen 10-20 órt bolady.
«Sońǵy 5 jylda 61 órt bolǵan, onyń 11-i pırotehnıkalyq buıymdardy durys qoldanbaýdan bolǵan. Alaıda jyldan jylǵa pırotehnıkalyq zattardy qoldaný azaıyp keledi. 2015 jyly - 21 órt, 2016 jyly – 10 órt, 2017 jyly 14 órt, 2018 jyly – 13 órt, 2019 jyly 5 órt tirkelgen. Sońǵy eki jylda pırotehnıkalyq buıymdardyń kesirinen órt bolǵan joq», - dedi TJD tótenshe jaǵdaılardan bolatyn táýekelderdi azaıtý jáne azamattyq qorǵanys salasyn baqylaý basqarmasynyń basshysy Aıdos Núsipbaev.
Onyń aıtýynsha, pırotehnıka ónimderin durys qoldanbaýdan adamdar jıi zardap shegedi.
«2015 jyldan bergi 4 jyl ishinde 138 adam jaraqat alǵan. Onyń ishinde 73-i - bala. Bir aıta keterligi, jyldan jylǵa jaraqat alǵandardyń sany azaıyp keledi. 2015 jyly - 57 adam, onyń ishinde 21 bala jaraqat alǵan. Bıyl qańtar aıynda 2 adam jaraqat aldy. Onyń biri – kámelet jasyna tolmaǵan bala», - dedi Aıdos Núsipbaev.
Almaty qalalyq jedel járdem stansasynyń mamany adamdardyń kóbinese qandaı jaraqatpen túsetinin aıtty.
«Kóbinese adamdardy kúıik shalady. Halyq arasynda 1-2 dárejeli kúıikpen jıi túsedi. Kóp jaǵdaıda adamnyń beti, qol-aıaǵy, kózi jaraqattanady. Balalarǵa 12 jasqa deıin pırotehnıkalyq zattardy qoldanýǵa bolmaıdy. Mindetti túrde qasynda eresek adam bolýy kerek», - dedi jedel járdem stansasynyń dárigeri Ásel Halılova.
