Almatyda Philarmonic New Year Fest birinshi qysqy festıvali ótedi

ALMATY. QazAqparat - 19 jeltoqsanda Qazaqstan Respýblıkasy Mádenıet jáne sport mınıstrliginiń qoldaýymen Jambyl atyndaǵy Qazaq memlekettik fılarmonııasynyń 85 jyldyq mereıtoıyna arnalǵan Philarmonic New Year Fest-2020 birinshi qysqy festıvaliniń ashylý saltanaty ótedi.

Merekelik marapattaý rásiminen keıin, ashylý keshi QR Memlekettik úrmeli aspaptar orkestriniń kontsertine ulasady.

Festıvaldiń maqsaty - álemdik klassıkalyq mýzykanyń hám uly Qazaq óneriniń rýhanı qarashańyraǵyna aınalǵan Jambyl atyndaǵy Qazaq memlekettik fılarmonııasynyń mereıtoıyn atap ótý jáne 85 jyl ishinde osy ujymda eńbek etken uly esimderdi ulyqtap, mýzyka óneriniń ozyq úlgilerin nasıhattaý.

Aıta keteıik, Jambyl atyndaǵy Qazaq memlekettik fılarmonııasy 1935 jyldyń 14 qańtarynda qurylǵan.

Tuńǵysh dırektory jáne kórkemdik jetekshisi bolyp mýzykatanýshy, ǵalym, kompozıtor, dırıjer, Qazaqstannyń Halyq artısi, akademık Ahmet Qýanuly Jubanov qyzmet atqarǵan.

Sol kúnnen beri 85 jyl kóleminde fılarmonııa elimizdegi eń iri mádenı ortalyqtardyń biregeıi ári Almaty qalasynyń tarıhı sáýletti ǵımaraty.

Bastalýy: 19 jeltoqsan, 18.00