Almatyda Pfizer vaktsınasy qansha adamǵa salyndy

ALMATY. QazAqparat – Almaty óńirlik kommýnıkatsııalar qyzmetiniń alańynda S.D. Asfendııarov atyndaǵy Qazaq ulttyq medıtsına ýnıversıtetiniń juqpaly jáne tropıkalyq aýrýlar kafedrasynyń professory Ravılıa Egemberdıeva 12 jastan asqan balalardyń ata-analaryn olardy vaktsınatsııalaýǵa shaqyrdy, dep habarlaıdy QazAqparat tilshisi.

Almaty qalalyq qoǵamdyq densaýlyq basqarmasynyń málimetinshe, qalada Pfizer preparatymen 2 736 adam vaktsınalanǵan: 1 644 jasóspirim, 251 júkti áıel jáne 841 bala emizetin ana.

Sıpker atap ótkendeı, almatylyqtardyń osy sanattaryn vaktsınatsııalaý sheshimi AQSh, Germanııa, Ulybrıtanııa, Izraıl, Belgııa, Úndistan jáne BAÁ tájirıbesine negizdelgen.
Ol Pfizer shyǵarǵan «Komırnatı» vaktsınasy DDU maquldaǵan tizimge engizilgenin eske saldy. Sondaı-aq, osy uıymnyń aralyq málimetteri boıynsha 12-15 jas aralyǵyndaǵy jasóspirimderdiń qatysýymen klınıkalyq zertteýlerdiń úshinshi kezeńi preparattyń joǵary tıimdiligi men aıtarlyqtaı joǵary qaýipsizdigin kórsetti.
Professor «Komırnatı» Pfizer vaktsınasy júkti áıelderge de usynylǵanyn tilge tıek etti.
«Olar kovıd ınfektsııasynyń aýyr jaǵdaıy úshin qaýip tobyna kiredi. Sondyqtan densaýlyqty jáne ómirge áli kelmegen náresteni COVID-19-dan qorǵaýdyń eń tıimdi ádisi-vaktsınatsııa.Eger áıel júktilikke deıin ekpe salyp úlgermegen bolsa, ony 16-37 apta aralyǵynda vaktsınalaný usynylady», - dedi Ravılıa Egemberdıeva.
Sonymen qatar, ol ata-analar balasynyń ómiri úshin jaýapty ekenin aıtty.
«Qazirgi kezde júkti áıelder men balalardyń ata-analary ózderiniń jáne balasynyń ómiri úshin jaýapty. Koronavırýs vaktsınatsııadan keıingi qysqa merzimdi janama áserlerge qaraǵanda áldeqaıda qaýipti», - deıdi ınfektsıonıst.
Ol COVID-19-ǵa qarsy vaktsınanyń áıelder men erlerdiń reprodýktıvti densaýlyǵyna keri áserin naqtylaıtyn dálelderdiń joq ekenin atap ótti.