Almatyda pedofılden 8 jasar qyzdy qutqaryp qalǵan oqýshy marapattaldy
ALMATY. QazAqparat - Túrgen aýylynda 8 jasar qyzdy 32 jastaǵy pedofılden qutqaryp qalǵan 11 synyp oqýshysy Tımýrbek Jamalladınovty Almatydaǵy Ǵylym ordasynda Qazaqstannyń ǵalymdary qurmet kórsetip, batasyn berdi, dep habarlaıdy QazAqparat tilshisi.
Búgin Almatydaǵy Ǵylym ordasynda QR BǴM Ǵylym komıtetiniń tóraǵasy Bolatbek Ábdirasylov bastaǵan ǵalymdar qaýymy 11 synyp oqýshysy Tımýrbek Jamalladınovty ózi oqıtyn mektep dırektorymen birge shaqyryp qurmet kórsetti. Ǵylym komıtetiniń tóraǵasy QR Bilim jáne ǵylym mınıstri E.Saǵadıevtiń atynan alǵys hat berip, sońǵy úlgidegi planshet pen uıaly smartfon tartý etti.
«Almaty oblysy Eńbekshi qazaq aýdany Túrgen aýylynda 8 jasar balany shabýyl jasaǵan 32 jastaǵy adamnan qutqaryp qalǵan Tımýrbekti arnaıy shaqyrtyp otyrmyz. Tımýrbek Táýelsizdikpen qurdas, Egemen eldiń búgingi jas batyry. Balamyzdyń bul áreketin batyrlyq dep baǵalaýǵa bolady. Tımýrbektiń erligine qarap Qazaqstanymyzdyń bolashaǵy qandaı ekenin batyl elestetýge bolady», - dedi Bolatbek Ábdirasylov.
Ǵalymdar aldynda sóz sóılegen mektep oqýshysy sasyp qalmady.
«Mınıstr Saǵadıev myrzaǵa, bilim grantyn berip jatqan oblys ákimi A.Battalov myrzaǵa alǵysymdy aıtamyn. Men muny erlik dep eseptemeımin. Meniń ornymda basqa oqýshy bolsa da ony arashalap qalar edi», - dedi Tımýrbek Jamalladınov.
Oqýshy bolǵan oqıǵany ashyp aıtpaǵanymen, shet jaǵasyn jetkizdi. Onyń aıtýynsha, sol kúni ol mekteptegi qosymsha sabaqtan qaıtyp kele jatqan. 8 jastaǵy qyzdy saıǵa alyp bara jatqan adamdy kórip, artynan barǵan.
«Qyz bala kómek surap aıqaılap jatty. Men baryp, ana adamnan arashaladym. Ony uryp jiberdim dese de bolady (óz sózi - red). Ol adam ustaldy. Keıin meni shaqyryp ol adamdy tanıtynymdy surap, bettestirdi. Qyz jylaýyn toqtatpady. «Jylama, bári jaqsy bolady», dep jubatyp, úıine jetkizip saldym. Ata-anasy alǵysyn bildirdi. Qyz qazir aýrýhanada jatyr. Ol da bizdiń mektepte oqıtyn qyz», - dedi 11 synyp oqýshysy.
Tımýr Jamalladınov Túrgen aýylyndaǵy D.A.Qonaev atyndaǵy orta mekteptiń 11 synyp oqýshysy. Onyń bul erligi úshin Almaty oblysynyń ákimi Amandyq Battalov oqý grantyn taǵaıyndady.
«Meniń armanym - mal dárigeri bolý. Oqý grantyn taǵaıyndap jatyr ǵoı, alǵys aıtamyn. Biraq, ózimdi synap, UBT tapsyryp kórmekpin», - deıdi Tımýr.
Jıyn sońynda ǵalym Ábsattar qajy Derbisáli Tımýr Jamalladınovke aq jol tilep, batasyn berdi.
Eske sala keteıik, 14 sáýir kúni Almaty oblysy Eńbekshi qazaq aýylynda 8 jasar qyzdy zorlamaq bolǵan 32 jastaǵy adamnan sol aýyldaǵy orta mekteptiń 11 synyp oqýshysy Tımýr Jamalladınov qutqaryp qalǵan bolatyn. 
