Almatyda pedıatrııa ortalyǵynda «Smart School-2» synyby ashyldy
ALMATY. QazAqparat – Almatyda Pedıatrııa jáne balalar hırýrgııasy ǵylymı ortalyǵynda statsıonarda jatqan naýqas balalar bilim alatyn ekinshi «Smart School» oqý synyby ashyldy, dep habarlaıdy QazAqparat tilshisi.
Innovatsııalyq oqý klasy aq qan aýrýyna, onkologııalyq dertke, sırek aýrýlarǵa shaldyqqan balalarǵa arnalǵan. Emdelý uzaq ýaqytty talap etetindikten, munda balalar jyldap jatady. Soǵan qaramastan endi, ortalyqta em alyp jatqan balalar emin úzbeı, zamandastarynan qalmaı, bilimderin odan ári jetildirip, bos ýaqyttaryn tıimdi ótkize alatyn bolady.
Ozyq qondyrǵylarmen jabdyqtalǵan smart synypty Pedıatrııa ortalyǵynyń basshysy Rıza Boranbaeva ashyp, tusaýkeser lentasyn eń jasy úlken ata-anamen birigip kesti.
«Búgin biz úshin, osynda em alyp jatqan balalar men olardyń ata-analary úshin qýanyshty kún. Balalarǵa úlken qýanysh syılaǵan, keń, ásem de jaryq synypty jasap, zaman talabyna saı jabdyqtap bergen demeýshilerge, atsalysqan eriktilerge barsha qaýym atynan sheksiz alǵysymyzdy bildiremiz. Ortalyǵymyzda ashylyp otyrǵan ekinshi smart-klasstyń balalardyń densaýlyǵyn jaqsartýǵa qosar úlesi mol bolary sózsiz dep bilemin. Bul ortalyqta onkologııalyq aýrýdan 125 tósek oryn bar. Birinshi ashqan synybymyzda osy balalardyń tek jartysyn ǵana qamtysaq, osy synybymyzdyń arqasynda oqytý protsesine endi barlyq balalar qatysa alady», - dedi Pedıatrııa ortalyǵynyń basshysy Rıza Boranbaeva.
Dárigerdiń aıtýynsha, balanyń kóńil kúıi, emotsııalyq ahýaly aýrýdan tez jazylýyna yqpal etedi.
«Biz osynyń aldynda birinshi ashqan smart synybymyzdyń nátıjesin aıta alamyz. Álbette, balanyń kóńil kúıi, emotsııalyq ahýaly óziniń súıikti isimen aınalysqanda óte joǵary bolady. Sonyń arqasynda balanyń emdelý protsesi de jyldam júredi. Bul turǵydan ǵylymı negizdemeler de bar. Balalarmen birge endi sabaqqa ata-analar da qatysa alady. Olar da uzaq merzimge sozylǵan aýrýdan júıkeleri tozady. Ata-analardyń da bir mezgil negatıvten kóńili bólinip, aýrý týraly umytqany da jaqsy», - dedi Rıza Boranbaev.
«Smart School-2» synyby úsh kabınetten turady. Zamanaýı quraldarmen jabdyqtalǵan oqý synybynda balalar matematıka, tarıh, aǵylshyn tili jáne basqa da jalpy pándermen birge, mektepke deıingi baǵdarlamany oqyp, bos ýaqyttarynda aǵylshyn tilin úırenip, shahmat, robototehnıka, konstrýktor quraý, sýret salý syndy shyǵarmashylyq jumystarmen de aınalysa alady. Sondaı-aq, bul synypta mýzyka men ertegilerdiń kómegimen terapııa seanstary ótkiziledi. Barlyq sabaqtar men úıirmeler tegin júrgiziledi. Joba aıasynda emhana saıqymazaǵy balalardyń kóńilin kóterip, túrli keshter uıymdastyryp, qýantyp otyrmaq. Synyp úlken ınteraktıvti taqtamen, ekologııalyq taza jıhazdarmen qamtamasyz etilgen. Zaman talabyna saı árlenip, bezendirilgen. Oqý úrdisi jańa ázirlemelerdiń arqasynda nátıjeli ári qyzyqty bola túsedi dep senemiz.
«Jańa synyptyń ashylýy emdelip jatqan balalar úshin psıhologııalyq turǵyda úlken kómegin bere otyryp, boılaryndaǵy qabiletterin ashýǵa da jańa múmkindikter beredi. Zamanaýı tehnologııalardyń kómegimen olar qurdastarynan artta qalmaı, zııatkerlik jáne shyǵarmashylyq qabiletterin damyta alady. Atap óte keteıin, kishkentaı patsıentterge ata-analarmen jáne balalarmen til tabysa alatyn bilikti mamandar, eriktiler dáris beredi. Bizdi eń qýantatyny, balalar statsıonarda uzaq merzimde em ala otyryp, oqý protsesinen qalys qalmaıtyn bolady», - deıdi «Help Today» qoǵamdyq qorynyń basshysy Elmıra Álıeva.
Onyń aıtýynsha, synypta aldaǵy ýaqytta ata-analar úshin psıhologııalyq qoldaý kýrstary ashylmaq.
Shara barysynda №3 onkogematologııa bólimi ata-analary atynan sóz sóılegen Madına Qunanbaeva balalar úshin jasalyp jatqan qaıyrymdy is úshin barsha qaýymǵa alǵysyn bildirdi.
Ozyq qondyrǵylarmen jabdyqtalǵan oqý synyby «Help Today» qoǵamdyq qorynyń qoldaýymen jáne «Samsung Electronics Central Eurasia», «Universal Masters», «Baı-Temır», «BioMarin Europe Limited» kompanııalarynyń demeýshiligimen iske asty.
Merekelik shara óner qaıratkerleriniń qatysýymen ótken shaǵyn kontserttik baǵdarlamamen aıaqtaldy.
