Almatyda «Paıdaly as - Salamatty el» festıvali ótýde
«Búginde elimizde ártúrli aýrýlarmen qatar, semizdik - úlken máselege aınalyp otyr. Al bul, kóp jaǵdaıda durys tamaqtanbaýdyń saldarynan bolatyndyǵy daýsyz. Qazir dúkender men bazarlarymyzda hımııalyq tyńaıtqyshtardyń kúshimen ósirilgen, gendik modıfıkatsııalanǵan aǵzalardan turatyn azyq-túlikter men jemis-jıdekter qaptap ketti. Al olardyń zııandylyǵy úlken. Sondyqtan, Almaty men Almaty oblysynda ekologııalyq jaǵynan taza ónimder, azyq-túlikter shyǵaratyn otandyq kásiporyndardyń, sharýa qojalyqtarynyń basyn qosyp, osyndaı festıval ótkizýdi jón kórdik. Endi aldaǵy ýaqytta festıvaldy qalanyń árbir aýdanynda ótkizip, keıin respýblıkalyq dárejede ótkizýdi aldymyzǵa maqsat etip qoıyp otyrmyz» - dedi óz sózinde búgingi sharanyń basty uıymdastyrýshysy - «Maks-El Medıa toby» JShS bas dırektory Gúlzııa Kýznetsova.
Búgingi festıval aıasynda sonymen qatar, alańda «Úlken qala jaǵdaıyndaǵy paıdaly as tujyrymdamasy» atty dóńgelek ústel bolyp jatyr.
Sondaı-aq, qaladaǵy belgili aspazdar men dıetologtardyń qatysýymen paıdaly taǵamdardy durys ázirleý boıynsha sheberlik dáristeri jurtshylyq nazaryna usynyldy.
Festıval aıasynda ekspress-dıagnostıka ortalyǵy uıymdastyryldy. Munda durys tamaqtaný salasynyń mamandary, dıetologtar kelýshilerge ár túrli aýrýlardan saqtaný, semizdikpen kúresý jáne durys tamaqtaný máseleleri boıynsha tegin aqyl-keńesterin berýde.
Búgingi festıvalge ár túrli ónimder shyǵaratyn otyzǵa jýyq uıymdar qatysty. Olardyń jaıma sórelerinen jáı sýlap qana ydys-aıaqtardy tazalaı berýge bolatyn shúberekterden bastap, ekologııalyq jaǵynan taza azyq-túlikterge deıin satyp alýǵa bolady.
Festıvalge Almaty qalasynyń ishki ister departamenti, Balalar men oqýshylardyń durys tamaqtaný saıasatyn endirý jáne baqylaý qaýymdastyǵy jáne Almaty qalasy Áýezov aýdanynyń ákimdigi qoldaý kórsetip otyr.
