Almatyda páterdi jalǵa berýshiler jaýapqa tartyldy
ALMATY. QazAqparat – Almaty polıtsııasy páterdi jalǵa berý qyzmetin kóshede júrip usynatyndardy jaýapqa tartty, dep habarlaıdy QazAqparat tilshisi.
Almaty qalalyq Polıtsııa departamentiniń málimetinshe, kóshe boıynda turyp páterlerdi saǵatqa, táýlikke jalǵa berýshiler ákimshilik jaýapkershilikke tartyldy. Olardyń basym bóligi basqa adamdardyń páterlerin jalǵa berip sodan kúndelikti paıda alatyn qosalqy jalǵa alýshylar.
«Karantın kezinde menshik nysanyna qaramastan, qalanyń aýmaǵynda kez kelgen áreketti toqtatý kerek dep buqaralyq aqparat quraldarynda keńinen jarııalanǵan bolatyn. Alaıda, bul azamattar jergilikti atqarýshy organdardyń buıryǵyn elemedi.Olar aqsha tabýǵa basa nazar aýdaratyny anyq, biraq kez kelgen kásipke qaraǵanda halyqtyń densaýlyǵy mańyzdy. Sanaly kásipkerlerdiń kópshiligi shyǵyndarǵa qaramastan óz qyzmetin toqtatty. Óıtkeni olar barlyq jaǵdaıdy, yqtımal táýekelderdi jáne karantındik rejımniń prıntsıpin túsinedi. Qurmetti almatylyqtar men qala qonaqtary, búgin siz úıden shyǵý arqyly ózińizge qaýip tóndiresiz, erteń siz aýrýhana tósegine jatyp qalýyńyz da múmkin, ol jerde sizdiń týystaryńyz da sizdi kóre almaıdy. Osyǵan baılanysty, biz azamattardy karantın rejımin sońyna deıin saqtaýǵa shaqyramyz. Óz qyzmetin tek qalanyń tirshilik etý nysandary, sondaı-aq jedel shtabtyń arnaıy tizilimine engizilgen uıymdar ǵana júzege asyra alady. Quqyq buzýshylardy qatań jazalaıtyn bolamyz», – dedi Almaly aýdandyq polıtsııa basqarmasynyń basshysy Esen Ysqaqov.
Kóshede páterdi jalǵa beretinder QR Ákimshilik quqyq buzýshylyq týraly kodeksiniń 476-baby (tótenshe jaǵdaıdy buzý) boıynsha ákimshilik jaýapkershilikke tartyldy.
