Almatyda páterdegi órt saldarynan bir adam qaza tapty
ALMATY. QazAqparat - Almatyda tórt qabatty turǵyn úıdiń páterin órt shaldy. Ony sóndirý barysynda bir adamnyń múrdesi tabyldy. Bul týraly búgin Almaty qalalyq TJD resmı ókili Sandýǵash Baımuhanbetova habarlady.
«2016 jyly 24 maýsymda 17 saǵat 03 mınýtta Almaty qalalyq TJD «101» kezekshi bólimine Almaly aýdany, Tóle bı kóshesi, 226 mekenjaıynda ornalasqan 4 qabatty turǵyn úıdiń 4-shi qabatynda páterdiń órtenip jatqandyǵy týraly habar kelip tústi.
Órt sóndirýshilerdiń alǵashqy toby oqıǵa ornyna 17 saǵat 12 mınýtta kelip jetti. Sóıtip, órtti sóndirýge jáne bir mezette turǵyndardy órt sóndirý satylary arqyly qaýipsiz aımaqqa shyǵarýǵa kiristi. Órtti sóndirý barysynda bir adamnyń múrdesi tabyldy. Qazir onyń aty-jóni anyqtalý ústinde.
Barlyǵy 50 adam qaýipsiz aımaqqa shyǵaryldy.
Al tilsiz jaý 17 saǵat 28 mınýtta aýyzdyqtalyp, 17 saǵat 37 mınýtta sóndirildi. Órttiń aýmaǵy - 40 sharshy metrdi qurady», - dedi S. Baımuhanbetova.
