Almatyda páterde jalǵyz qalyp qoıǵan 2 jasar bala qutqaryldy
NUR-SULTAN. QazAqparat – Almatyda páterde jalǵyz qalyp qoıǵan 2 jasar bala qutqaryldy, dep habarlaıdy QazAqparat QR Tótenshe jaǵdaılar mınıstrliginiń baspasóz qyzmetine silteme jasap.
Baspasóz qyzmetiniń málimetterine qaraǵanda, 2021 jylǵy 15 qańtarda tańerteń kezekshiliktegi qyzmetkerge er adam habarlasyp, páterde eki jasar balanyń qamalyp qalǵany týraly habarlaǵan.
«Jedel toppen birge bas qutqarýshy-psıholog birden oqıǵa ornyna shyqty. Oqıǵa ornynda anasy páterden shyqqan sátte esik jabylyp qalyp, eki jasar balanyń páterde jalǵyz qalyp qoıǵany anyqtaldy. Al osy kezde gaz plıtada sháınek turǵan jáne ol balanyń ómirine qaýipti edi.
«Úıde jalǵyz qalyp qoıǵan balany qorqytyp almas úshin, respýblıkalyq jedel qutqarý jasaǵynyń (RJQJ) qutqarýshylary gıdravlıkalyq quraldyń kómegimen, tereze torlaryn keńeıtip, terezeni ashty. Qutqarýshylar tereze arqyly ishke kirip, gaz plıtany óshirip, páterdiń ishinen esikti ashty. Operatsııa jedel ótti. Bala qatty qorqyp qalǵan. Bas qutqarýshy - psıholog ana men balaǵa shuǵyl psıhologııalyq kómek kórsetti»,-delingen baspasóz habarlamasynda.
