Almatyda páter jaldaýshy úı ıesin óltirdi
ALMATY. QazAqparat – Almatyda páter jaldaýshy úı ıesin óltirdi, dep habarlaıdy QazAqparat tilshisi.
Qaıǵyly oqıǵa Alataý aýdanyndaǵy jer úılerdiń birinde bolǵan.
Almaty qalalyq Polıtsııa departamentiniń málimetinshe, er adam men áıel bir bólmeni jaldaǵan.Úı ıesi olarǵa ishimdik iship, shýlaýǵa bolmaıtynyn aıtyp, eskertken.
«Ol kete salysymen ekeýi ishimdik iship, shýlaǵan. Úı ıesi olarǵa eskertý jasaǵan. Osy kezde olardyń arasynda janjal shyqqan. Áıel ústeldiń ústindegi pyshaqty alyp, úı ıesine salǵan. 50 jastaǵy er adam sol jerde kóz jumdy. Kúdiktiler ustaldy. Ekeýi de mas bolǵan. Olar Alataý aýdandyq polıtsııa basqarmasyna jetkizildi»,- dep habarlady polıtsııadan.
Atalǵan qylmysqa qatysty sotqa deıingi tergeý jumystary bastaldy.
