Almatyda páter urylary ustaldy
ALMATY. QazAqparat - Almaty polıtsııasy buryn sottalǵan páter urylaryn ustady, dep habarlaıdy QazAqparat tilshisi.
Almatyda páter tonaýmen aınalysqan qylmystyq top ustaldy. Tártip saqshylary úsh adamdy Alataý shaǵyn aýdanynda kezekti qylmys jasap, izin sýytqaly jatqan kezde jolyn kesti.
«Ustalǵan kezde kóliktiń ishinen temir seıf, altyn buıymdar men teledıdar tabyldy. Keıin anyqtalǵandaı, bul múlik qylmystyq jolmen alynǵan: arnaıy operatsııadan birneshe mınýt buryn urylar jeke jer úıdi tonap, onyń ıesine aıtarlyqtaı shyǵyn keltirgen. Sondaı-aq, kúdiktilerdiń turǵylyqty jerinen 10 noýtbýk, ártúrli markaly 7 uıaly telefon tárkilendi. Kúdiktiler páter urlyǵymen aınalysatyndaryn moıyndady. Olar osyǵan uqsas 20 qylmys jasaǵan», - dedi qalalyq qylmystyq polıtsııa basqarmasynyń bastyǵy Janbolat Zıadın.
Kúdiktiler úıge tereze arqyly kirgen. Kóbine olar úıdi adamdar uıyqtap jatqan kezde tonaǵan. Jeńil jolmen tapqan oljalaryn armıan nómirin taqqan qara «BMW 525» markaly avtokólikke tıep, áketip otyrǵan.
Sonymen qatar, kúdiktilerdiń dúken men sulýlyq salonyn da tonaǵany belgili boldy. Qazir olar ýaqytsha ustaý ızolıatoryna qamaýǵa alyndy.
«Naýryzbaı aýdanynda olardyń 10 qylmysqa qatysy bar ekeni anyqtaldy. Muny sotqa deıingi tergeýdiń bastapqy kezeńinde bildik. Tergeý aıaqtalǵanǵa deıin bul kórsetkish artýy múmkin. Sonymen qatar kúdiktilerdiń úıinen tárkilengen zattardyń naqty ıelerin anyqtaý jumystary júrgizilýde», - dedi óz kezeginde Naýryzbaı aýdandyq polıtsııa basqarmasynyń bastyǵy Dıdar Ahanov.
