Almatyda páter urlyǵymen aınalysqan qylmystyq top ustaldy
ALMATY. QazAqparat - Almatyda páter tonaýmen aınalysqan qylmystyq top ustaldy, dep habarlaıdy QazAqparat tilshisi.
Úsh adam páterlerge kirip, qundy zattardy urlaıtyn bolǵan. Olardyń 11 qylmystyq epızodqa qatysy bary anyqtaldy.
«Ustalǵandardyń úsheýi de Almaty oblysynyń turǵyndary. Olardyń ekeýi buryn múliktik qylmystar jasaǵany úshin sottalǵan. Kúdiktiler osydan bir kún buryn Qabanbaı batyr kóshesinde ornalasqan páterlerdiń birine urlyqqa túskennen keıin ustaldy. Ońaı aqshaǵa qunyqqan olar aqsha men qundy múlikterdi alyp ketken. Urlanǵan zattar tárkilendi. Qazir olardyń Almaty qalasynyń aýmaǵynda jasalǵan 11 qylmysqa qatysy bar ekendigi anyqtaldy»,– dedi Almaty qalasy Polıtsııa departamenti bastyǵynyń orynbasary Berik Ábilbekov.
Sonymen qatar, ustalǵan qylmystyq topty Nur-Sultan men Shymkent qalalarynyń polıtseıleri de izdep jatqany belgili boldy.
