Almatyda páter tonaýshylar toby ustaldy
ALMATY. QazAqparat - Almatyda páter tonaýmen aınalysqan urylar ustaldy, dep habarlaıdy QazAqparat tilshisi. Qalalyq Polıtsııa departamentiniń baspasóz qyzmeti málim etkendeı, tórt adamnan turatyn top kiltteri sáıkes kelgen bóten úılerdi tonap ketip júrgen.
«Bulardyń árqaısysy ózinshe bir qyzmet atqarǵan. Bireýi kólik aıdaǵan, ekinshisi syrttan baqylap turyp, úshinshisi úıdi tonaýmen aınalysqan. 23-29 jastaǵy jigitter bir-birimen jaqyn tanys bolǵan. Olar bir úıden teledıdardy urlap, ony 60 myń teńgege satqan. Endi ózara sybaılasa jasaǵan urlyq úshin jaýap beredi. Qazir olardyń basqa da qylmystarǵa qatysy barlyǵy tekserilip jatyr. Ustalǵandar ýaqytsha oqshaýlaý ızolıatorynda qamaldy. Tergeý amaldary júrgizilip jatyr», - dedi polıtsııa departamentinen.
Aıta ketý kerek, jyl basynan beri Almatyda 194 ury ustaldy. Olar qala kóshelerinde, qoǵamdyq kólikterde turǵyndardyń qaltasyna túsip otyrǵan.
«Tájirıbe kórsetkendeı, olar qoǵamdyq oryndarda tańerteń jáne keshke shyǵady. Óıtkeni, osy ýaqyttarda urlyqqa shyqqan tıimdi. Biraq polıtsııa urlyqtyń aldyn alý maqsatynda birqatar is atqaryp jatyr. Atap aıtqanda, 194 urynyń sýreti qoǵamdyq oryndarda jarııalandy. Endi olardyń kópshiligi óziniń týystary men tanystarynan uıalyp, aıaq tarta bastady», - dedi qalalyq Polıtsııa departamentiniń krımınaldy polıtsııa basqarmasy basshysy Esen Ysqaqov.
