Almatyda páter tonaýshylar toby áshkerelendi
ALMATY. Tamyzdyń 26-sy. QazAqparat - Qylmyskerler kezekti urlyq ústinde ustaldy. Bul joly jaýyz nıettilerdiń nazary Qabanbaı batyr kóshesindegi 260-úıdiń páterleriniń birine túsken, dep habarlaıdy Almaty qalalyq ІІD baspasóz qyzmeti.
«Shamamen, kúndizgi saǵat bir jarymda polıtsııaǵa jergilikti turǵyn telefon shalyp, esiktiń kózeginen (glazok) baspaldaq alańshasyna qaraǵanda joǵary qabatqa kóterilip bara jatqan eki kúdikti er adamdy kórgenin habarlaǵan. Polıtsııalar dereý serpilis tanytyp, kózdi ashyp-jumǵansha podezge kelip jetken eki birdeı «Boran» patrýldi ekıpajy kireberisti muqııat tekserip, kirer esik kilti syndyrylǵan páterdi ańǵarǵan»,- dep habarlady sharanyń bastapqy mán-jaıy týraly patrýldi polıtsııa polkiniń komandıri, polıtsııa maıory Serik Kenenbaev.
Formadaǵy adamdardy kórip qalǵan shaqyrylmaǵan qonaqtar terezege qaraı asyqqan. Úshinshi qabatta ornalasqan atalmysh páter aram pıǵyldylar úshin bóget bolmaı, terezeden sekirip ketken olar, polıtseılerdiń basqa tobymen kezdeskenderine ań-tań qalǵan.
«Patrýldi polıtsııa polkiniń narıady kásibı qyzmetterinde jıi kezdesetin alýan túrli jaǵdaılarda ózderiniń jaýyngerlik jáne qyzmettik daıyndyqtaryn qoldanyp jatady. Bul joly da topqa bólingen kúzet polıtseıleri kúdiktilerdiń barlyq jolyn qorshap alady. Tájirıbe kórsetkendeı, ýaqtyly kórsetilgen tıisti shara nátıjesinde qylmyskerlerdiń óz josparlaryn júzege asyrýynyń jolyn kesedi»,- dep atap ótti maıor Kenenbaev.
Páter tonaýshylar qalada osy úıdiń aýlasynda turǵan «Leksýs» avtokóligimen júrgendigi anyqtaldy. Kólikti tekserý kezinde polıtseıler 5 noýtbýk pen birneshe uıaly telefon tabyldy. Tabylǵan zattar da urlanǵan degen joramal bar. Birinshi jaýap alýda-aq ustalǵandar óz kinálerin moıyndady.
Serik Kenenbaevtyń sózine qaraǵanda, ustalǵandardyń ekeýi de Shyǵys-Qazaqstan oblysynyń turǵyndary bolyp shyqty. Eske sala ketetin bolsaq, olardyń ekeýi de urlyq jáne qaraqshylyq shabýyl jasaǵany úshin buryn qylmystyq jaýapkershilikke tartylǵandar. Tergeý páter urylarynyń basqa da ashylmaı jatqan qylmystarǵa qatystylyǵyn tekserýge múddeli.
