Almatyda páter tonaýshy polıtseılerge pyshaq ala umtylǵan (FOTO)
ALMATY. QazAqparat - Almatynyń jol-patrýldik polıtsııasy pyshaqpen qarýlanǵan páter tonaýǵa kúdiktini oqıǵa ornynda qolǵa túsirdi. Bul týraly búgin Almaty qalalyq ІІD baspasóz qyzmetinen habarlady.
Bul páter tonaý áreketi Almaty qalasynyń Áýezov aýdanynda tústen keıin saǵat 14:00-den asqan ýaqytta tirkeldi. «102» kezekshi bólimine úreılengen áıel habarlasyp, Shuǵyl basqarý ortalyǵynyń operatoryna belgisiz bireý páteriniń syrtqy esiginiń qulpyn syndyrmaq bolyp jatqanyn sybyrlap jetkizedi.
«Bul aqparat sol jerge jaqyn mańda júrgen «Boran-102» ekıpajyna shuǵyl berildi. Birneshe mınýttan keıin turǵyn úıdiń kireberisine kelip jetken patrýl qyzmetkerleri bólinip, kúdiktiniń sheginýi múmkin joldaryn bógedi. Sodan dálizge kirgen ınspektorlar, ekinshi qabattyń baspaldaq alańqaıynda oń qolyn sol jaq tós qaltasyna salyp turǵan beıtanys er azamatty baıqady. Ol polıtsııa qyzmetkerleriniń zańdy talaptaryna baǵynbaı, jańaǵy qolyn salyp turǵan qaltasynan úlken as pyshaǵyn sýyryp alyp, tártip saqshylaryna shabýyl jasady. Qaskúnem der kezinde zalalsyzdandyrylyp, ustaldy. Al keıin ony páter ıesi de tanydy», - dedi óz sózinde Almaty qalalyq ІІD Jol-patrýldik polıtsııa polkiniń komandıri, polıtsııa podpolkovnıgi Aıtjan Álmuhambetov.
Belgili bolǵanyndaı, bul qylmysqa barǵan kórshi yqshamaýdannyń turǵyny bolyp shyqty. Ol: «páterde eshkim joq», - dep oılap, ony tapa-tal túste tonamaq bolǵan. Alaıda onyń bul jaýyz nıeti júzege aspady.
«Esiktiń syrtyndaǵy tysyrdy eń aldymen meniń qyzym estip qoıdy. Sodan maǵan aıtty. Biz jaılap baryp, esiktiń dóńgelek shynysynan qarasaq, bir erkek esiktiń qulpyn syndyrmaq bolyp jatyr eken. Biz keıin sheginip, shetki bólmege kirdik. Sóıtip men polıtsııaǵa habarlastym. Jigitter der kezinde kelip jetti. Eki mınýt ótpeı-aq esik syrtynan shyqqan shýdy estidik. Sóıtsek, polıtseıler kúdiktini ustap jatyr eken. Olarǵa kóp-kóp rahmet. Eger olar der kezinde kelip jetpegende ne bolaryn bir qudaı biledi. Aıtpaqshy, bul erkekti men budan eki kún buryn ózimizdiń kireberis dálizden kórgenmin. Sol kezde-aq ol qaraılap júrgen eken», - dedi jábirlenýshi.
