Almatyda páter tonaýmen aınalysyp kelgen birneshe top quryqtaldy

Birinshi topty 36 jastaǵy Zıfat esimdi tájikstandyq kelimsek  basqarǵan. Ol óz Otanynda birneshe ret bótenniń múlkin urlap, bizdiń el aýmaǵynda boı tasalap júrgender qatarynan bolyp shyqty. Tájirıbeli páter urysy Reseı Federatsııasynda óziniń jymysqy áreketi úshin jazasyn ótegennen keıin Almatyǵa at basyn tireýdi jón sanaǵan. 2011 jyly Almatyǵa kelgen ol Ońtústik Qazaqstan oblysy Kentaý qalasynyń 40 jastaǵy turǵynymen páter tonaýǵa ýaǵdalasyp, qylmystyq top jasaqtaǵan. Olar ózderiniń qylmystyq is-áreketterin kóp qabatty elıtalyq úılerde júzege asyryp kelgen jáne tek qana aqshalaı qarajatty jymqyrýmen aınalysqan. Qazirgi ýaqytta olardyń jeti qylmysqa qatysy bary anyqtalyp otyr.  

Al úsh adamnan turatyn ekinshi top Almaty oblysy Raıymbek aýdanynyń turǵyndary bolyp shyqty. Túrli eldi-mekenderden kelgen olar Almatyda qylmystyq top quryp, tek qana qalanyń Alataý aýdany aýmaǵyndaǵy jeke sektordaǵy úılerdi tonaýmen aınalysqan. Olar qolyna ilingen turmystyq tehnıka men áshekeı buıymdardy, alyp shyǵýǵa yńǵaıly basqa da  zattardy jymqyryp júrgen. Nebári birneshe aptanyń ishinde segiz úıdi tonap úlgergen. Tergeý amaldary aıaqtalǵansha jábirlenýshiler sany budan da arta túsýi múmkin degen boljam bar. Qylmystyq toptyń serkesi 27 jasta bolsa, qalǵan ekeýi 26-da. Esh jerde jumys istemeıtin olar mundaı qylmysqa materıaldyq jaǵdaılarynyń tómendigi saldarynan barǵandyqtaryn aıtyp aqtalýda.