Almatyda Parkınson aýrýyna shaldyqqan 28 naýqasqa operatsııa sátti jasaldy
Bıyl aqpan aıynda Almatydaǵy Ortalyq klınıkalyq aýrýhanada Parkınson aýrýyn hırýrgııalyq emdeý ortalyǵy ashylǵan bolatyn. Sodan bergi aralyqta Prezıdenttiń Іs Basqarmasyna qarasty klınıkada 28 operatsııa sátti jasaldy. Olardyń deni mindetti áleýmettik medıtsınalyq saqtandyrý aıasynda ótti.
Ortalyq klınıkalyq aýrýhanada kúrdeli otany belgili neırohırýrg, medıtsına ǵylymdarynyń kandıdaty Shyńǵys Shashkın bastaǵan bilikti úsh dáriger jasaıdy. Sh.Shashkın mı men julynǵa neırostımýlıator ımplanttaýǵa mamandanǵan elimizdegi alǵashqy neırohırýrg.
«Almatyda kvota boıynsha operatsııa jasalǵan alǵashqy adamnyń jasy – jetpiste. Ol 8 jyl buryn aýrýdyń asqynǵan túrine shaldyqqan. Qazaqstan boıynsha mundaı aýrýlardyń sany 30 myńǵa jýyqtaıdy, kóbisi egde tartqan adamdar. Degenmen, óz tájirıbemde 25 jastaǵy naýqasty da kórdim», – deıdi dáriger.
Shyńǵys Shashkın operatsııanyń qalaı jasalatynyn aıtyp berdi. Ol úshin naýqastyń mıyna jińishke elektrod engizilip, ol buǵana súıeginiń tómengi tusynda teriniń astyna ornatylǵan neırostımýlıatorǵa qosylady. Árıne, naýqas operatsııadan keıin qulan taza aıyǵyp ketpeıdi. Biraq bulshyqeti istemeı qalǵan jandardyń ómiri aıtarlyqtaı jaqsarady.
Álemde bıostımýlıator salý boıynsha alǵashqy operatsııa 1987 jyly jasalǵan. Qazir neırostımýlıatsııa tásili AQSh-ta, Eýropa men Azııanyń birqatar elinde qoldanylady. Bul ádis Qazaqstanda tuńǵysh ret 2013 jyly tájirıbeden ótkizildi. Sodan beri kúrdeli operatsııa Astana men Qaraǵandyda jasalyp kelgen bolatyn.
«Ortalyq klınıkalyq aýrýhana bazasynda Parkınson aýrýyn emdeıtin hırýrgııalyq ortalyqtyń ashylǵany tamasha sheshim boldy. Elimizdegi halyqtyń alpys paıyzdan astamy ońtústik óńirlerde shoǵyrlanǵan. Olardyń osyǵan deıin ózderi turatyn óńirde tegin emdelýge múmkindigi bolmaǵan edi. Qazir tegin otaǵa 29 adam kezekte tur», – deıdi Sh.Shashkın.
Hırýrg Parkınson aýrýynyń aldyn alý úshin salaýatty ómir saltyn saqtap, kóbirek qozǵalyp, durys tamaqtaný kerektigin aıtady.