Almatyda paratsetamol jáne ózge de dáriler satylymy shekteledi
NUR-SULTAN. QazAqparat - Almaty dárihanalarynda qalada oryn alǵan dúrligýge baılanysty bir adamǵa 2-3 orama paratsetamol ǵana satylatyn bolady. Bul týraly qala ákimdiginiń dárilik preparattarmen qamtamasyz etý jónindegi úılestirýshisi Zańǵar Sálimbaev aıtty, dep habarlaıdy QazAqparat tilshisi.
«Biz áleýmettik jelide úlken dúrbeleń júrip jatqanyn kórip otyrmyz. Adamdar ózin-ózi emdeýmen aınalysyp ketken. Turǵyndar tarapynan dári-dármektiń belgili bir túrlerine suranys óte joǵary bolyp tur. Aıtalyq, adamǵa ne bári 2 orama paratsetamol qajet bolǵanymen ol 20 oramasyn biraq satyp alady. Barlyǵyn da dári-dármektiń jetkilikti sanymen qamtamasyz etý úshin biz bir adamǵa 2-3 orama ǵana sharalaryn qolǵa alǵymyz keledi. Bul búgingi kúni suranysy joǵary bolyp otyrǵan dárilerge de qatysty bolmaq», - dedi Zańǵar Sálimbaev.
Onyń atap ótýinshe, medıtsınalyq maska tóńireginde de dál osyndaı jaǵdaı oryn alǵan bolatyn.
«Olar qalada jetkilikti kólemde bolǵan edi. Biraq, adamdar dárihanaǵa kelip, artyǵymen satyp aldy. Dál sondaı jaǵdaı qazir de oryn alý ústinde. Dáriler bizde úzdiksiz jetkizilip turǵanymen, qalaı degende de, baqylaý qajet», - dedi ol.
Al Almaty qalalyq taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Murat Muhamedııarov dúısenbige qaraı satylymǵa 250 myń orama paratsetamol kelip túsetinin atap ótti.
«Taıaý ýaqytta qalaǵa vırýsqa qarsy 70 myń orama dári jetkiziledi. Qyzý túsiretin jáne vırýsqa qarsy preparattardyń bar bolýyna kúndelikti monıtorıng júrgizip otyramyz», - dedi ol.
Munan bólek, dúısenbi kúni 30 myń termometr qala dárihanalarynda satylymǵa shyǵarylmaq.
«Mundaı sheshim ákimdikpen jáne Almaty qalalyq taýarlar men kórsetiletin qyzmetterdiń sapasy men qaýipsizdigin baqylaý departamentimen kelisilgen. Bul adamdar túsinip ári túsinistik tanytýy úshin jasalyp otyr. Óıtkeni, mundaı bolmaýy kerek. Ózin-ózi emdeýmen aınalysýǵa bolmaıdy», - dep túsindiredi Qazaqstannyń farmatsevtıkalyq qyzmetin qoldaý jáne damytý qaýymdastyǵynyń prezıdenti Marına Dýrmanova.
Almaty qalasy ákimdiginiń dárilik preparattarmen qamtamasyz etý jónindegi úılestirýshisi Zańǵar Sálimbaevtyń naqtylaı túsýinshe, dárihanalarda satylymy shekteletin 6-7 dári bolady.
«Paratsetamol, sýmamed jáne adamdar jappaı satyp alyp jatqan dáriniń ózge de túrleri bar. Bul dárilerdiń satylymyna shekteý engizemiz. Degenmen, olar qala dárihanalaryna jetkilikti kólemdi jetkiziletin bolady», - dedi Zańǵar Sálimbaev.
