Almatyda para alǵan polıtseı sottaldy
ALMATY. QazAqparat - Almatyda para alǵan polıtseı sottaldy. Bul týraly qalalyq sottyń baspasóz qyzmeti habarlady.
Іs materıaldaryna sáıkes, qalalyq ІІD jol-patrýldik polıtsııasynyń qyzmetkeri B.Dáýitbaev Seıfýllın-Maqataev kósheleriniń qıylysynda qyzmetin atqara júrip qoǵamdyq kólikti toqtatqan.
Polıtseı avtobýs júrgizýshisi Naýryzbaev esirtki shekti dep kúdiktengen. Polıtseı júrgizýshige «ákimshilik hattama toltyram, kýáligińnen aırylasyń» dep qorqytqan. Daýytbaev «eger 1000 AQSh dollary kóleminde para berseń, jyly jaýyp qoıamyz» degen. Aqshany óz qolymen almaý úshin polıtseı óziniń tanysy Ábenovti tartqan. Keshki 21:00 shamasynda Sinooil janarmaıquıý stansasynda Ábenov Naýryzbaevtan 365 myń teńge kólemindegi qarjyny alady. Para alý protsesine Sybaılas jemqorlyqpen kúres qyzmetiniń ókilderi kýá bolǵan.
Medeý aýdandyq soty Dáýitbaevty QR QK 24-babynyń 3-bólimimen, 366-babynyń 2-bólimimen aıypty dep taýyp, para kóleminen 60 ese artyq soma, ıaǵnı 21,9 mln teńge kóleminde aıyppul saldy.
Ábenov te QR QK 368-babynyń 1-bólimimen aıypty dep tanylyp, para kóleminen 10 ese artyq soma 3,65 mln teńge tóleýge májbúrlendi.
