Almatyda para alǵan órt sóndirý qyzmetiniń mamanyna jaza taǵaıyndaldy
ASTANA. QazAqparat - Almaty qalasy Jetisý aýdanynyń №2 soty para aldy dep aıyptalǵan Almaly aýdandyq tótenshe jaǵdaılar qyzmetiniń bas mamany R. Júnisovke qatysty qylmystyq isti qarady, dep habarlaıdy QR Joǵarǵy Sotynyń baspasóz qyzmeti.
«Sottyń anyqtaýy boıynsha, R. Júnisov Almaty qalasy Almaly aýdandyq Tótenshe jaǵdaılar bóliminiń bas mamany retinde óz qyzmetiniń sheńberinde «Tengız-Servıs» JShS-nda órt qaýipsizdigi erejeleriniń saqtalýy boıynsha tekserý, órt qaýipsizdigi erejeleriniń buzylǵandyǵyn anyqtaǵan. R.Júnisov «Tengız-Servıs» JShS-nyń basshysyn ákimshilik jaýapkershilikke tartpaý úshin odan 120 myń teńge kóleminde para alǵan», delingen habarlamada.
Sot otyrysy barysynda R. Júnisov kinásin tolyǵymen moıyndap, jasalǵan is-áreketine ókinetinin aıtty.
Sot úkimimen R.Júnisov Qazaqstan Respýblıkasy Qylmystyq kodeksiniń 366 babynyń 2 bóliginde (para alý) kózdelgen qylmystyq is- áreketti úshin kináli dep tabyldy. Oǵan paranyń alpys eselengen somasy mólsherinde, ıaǵnı 7,2 mln teńge kóleminde aıyppul jazasy taǵaıyndaldy.
Sot sottalýshynyń múlkin tárkilep, memlekettik qyzmette belgili bir laýazymdardy atqarý quqyǵynan aıyrdy. Ony sonymen qatar órtke qarsy qyzmet maıory arnaıy ataǵynan aıyrdy.
Úkim zańdy kúshine engen joq.
