Almatyda pandýsy joq mekemelerge aıyppul salyndy
ALMATY. QazAqparat – Almatyda «Múgedekterdi áleýmettik qorǵaý týraly» zańnyń talabyn saqtaý boıynsha 2019 jyly 70 obektige tekserý júrgizilip, talaptardy saqtamaǵan mekemelerge aıyppul salyndy. Bul týraly Eńbek, áleýmettik qorǵaý jáne kóshi-qon komıtetiniń Almaty qalasy boıynsha departamentiniń basshysy Aıdynjan Narmatov aıtty, dep habarlaıdy QazAqparat tilshisi.
«Tekserý nátıjesi boıynsha, kóptegen kemshilik anyqtaldy, atap aıtqanda pandýstardyń joqtyǵy, obektilerde bar pandýstardyń standarttarǵa saı kelmeýi, múmkindigi shektýli azamattarǵa kólik turaqtarynyń joqtyǵy, obektilerde kózi kórmeıtin adamdar úshin taktıldi taqtaıshanyń, arnaıy joldaıtyn belgilerdiń joqtyǵy, sanıtarlyq-gıgıenalyq bólmeleriniń saı bolmaýy t.b.»,– deıdi departament basshysy.
Tekserý nátıjesi boıynsha anyqtalǵan buzýshylyqtardy joıý týraly 44 obektiniń basshylaryna uıǵarym berildi, 3 sýbektige jalpy somasy 270 AEK mólsherinde aıyppul salý arqyly ákimshilik jaýapkershilikke tartyldy (530 250 teńge tolyǵymen óndirip alyndy), 28 mekemede anyqtalǵan buzýshylyqtar joıyldy, 16 nysan boıynsha jumystar júrgizilýde.
Aıta keteıik, QR múgedekterdi áleýmettik qorǵaý týraly zańnamasyna sáıkes múgedekterdiń áleýmettik jáne kólik ınfraqurylym obektilerine qoljetimdiligi bolmaǵan jaǵdaıda laýazymdy adamdarǵa – 50 AEK, shaǵyn kásipkerlik sýbektilerine – 120 AEK, orta kásipkerlik sýbektilerine – 200 AEK, iri kásipkerlik sýbektilerine – 400 AEK mólsherinde aıyppul salynady.
