Almatyda pandemııa kezindegi mádenıet pen sport salasynyń damýy talqylandy
ALMATY. QazAqparat- Almatyda mádenıet jáne sport salasynyń pandemııa jaǵdaıyndaǵy damýy Azamattyq forým barysynda talqyǵa tústi, dep habarlaıdy QazAqparat tilshisi.
Forým qatysýshylary pandemııa kezinde mádenı buqaralyq sharalardy iske asyrý máselelerin sóz etti.
«Bizdiń jıynnyń maqsaty osy sala mamandarynyń pikirin tyńdaý. Sondaı-aq, daǵdarysty jeńý týraly sheshimderdi de qarastyrý kózdelgen»,- dedi moderator qoǵamdyq keńes múshesi Beknur Qısyqov.
Mádenıettanýshy Olga Veselovanyń aıtýynsha, onlaın formattyń ózektiligine baılanysty zamanaýı qazaqstandyq kontentti damytý mańyzdy.
«Sýretshilerge pandemııa óte qatty áser etken joq. Satý jaǵynan qıyndyq boldy. Sebebi, galereıalar jabyq. Bizde onlaın dúken damymaǵan. Ony moıyndaý kerek. Sol úshin arnaıy saıt jasadyq. Ol jerde sýretshilerdiń eńbegimen tanysýǵa bolady. Saıtymyz ázirge aǵylshyn tilinde istep tur. Qazir aqparatty qazaqshaǵa, orysshaǵa aýdarýdy oılastyryp jatyrmyz. Bizge onlaın galereıa qajet», - dedi Olga Veselova.
«Bizge buqaralyq sport sharalaryn ótkizýge qatań tyıym salynǵan. Osy máselege jeke toqtalý kerek edi. Adam sanyna qaraı erejeni qaıta qaraý kerek», - dedi «Almaty marafon» uıymdastyrýshysy Saltanat Qazybaeva.
Qalalyq Deneshynyqtyrý jáne sport basqarmasynyń basshysy Rústem Baıseıitov epıdemıologııalyq ahýalǵa baılanysty barlyq sport sharalaryna qatysty shekteý qoıylǵanyn aıtty.
«Ár sharanyń uıymdastyrýshylarymen jeke-jeke keńesemiz. Sharanyń algorıtmin SES mamandarymen birige qaraımyz. Sanıtarlyq normalar qanshalyqty saqtalatyny aldyn ala baǵalanady», - dedi basqarma basshysy.
Dıskýssııa barysynda kásipker Erlan Stambekov polıtehnıkalyq ınstıtýt janyndaǵy alleıany Dos-Muqasan tobynyń atyna berýge usynys aıtty.
«Jyl saıyn qalamyzda túrli mádenı oryndar paıda bolady. Bul másele ákimdikpen birge sheshiledi. Almaty turǵyndary bul ıdeıaǵa qarsy bola qoımas», - dedi mádenı oryndar kartasy jobasynyń avtory Baǵıla Ahatova.
