Almatyda pán olımpıadalarynda kórsetilgen joǵary bilim men kásibı sheberligi úshin Qarasaı aýdanynyń úzdik muǵalimderi marapattaldy
ALMATY. 31 tamyz. QazAqparat - Búgin Almatydaǵy QR Tuńǵysh Prezıdenti qorynda dástúrli «Tilashar» aktsııasy ótti.
Bıyl tórtinshi ret ótkizilgen bul sharanyń uıymdastyrýshysy Almaty oblysyndaǵy «Qarasaı aýdanynyń bilim berý qory» korporatıvtik qory. Onda pán olımpıadalarynda kórsetilgen joǵary bilim jáne kásibı sheberligi úshin aýdannyń úzdik 20 muǵalimi arnaıy dıplomdarmen marapattaldy. Olardyń ishinde Eńbekshi orta mektebinen Qaldygúl Nurǵalıeva, Alǵabas orta mektebinen Ásel Núsipálıeva, Y.Altynsarın atyndaǵy orta mektepten Amangeldi Abdýllaev, Ýshınskıı atyndaǵy orta mektepten Sálıma Ýaqasova, Ǵ. Mustafın atyndaǵy orta mektepten Jansaıa Baıtaqbaeva jáne daryndy balalarǵa arnalǵan úsh tilde oqytatyn Ál-Farabı atyndaǵy arnaýly gımnazııadan Álııa Smanova, Ásem Qalymova, Jańylhan Tastaǵanova men ózge de bilim ordalarynyń oqytýshylary bar. Bul aktsııa kezinde sondaı-aq, az qamtamasyz etilgen jáne ózge de otbasylardaǵy 1-inshi synypqa baratyn 200 balaǵa mektepke qajetti oqý jabdyqtary berildi.
«Úzdik muǵalimderdi ózimiz mektep pen ondaǵy oqýshylardyń pándik olımpıadalar men ózge de shyǵarmashylyq baıqaýlarda kórsetken joǵary nátıjesine jasalǵan arnaıy reıtıng boıynsha anyqtadyq. Endi kelesi jyldan bastap joǵary oqý oryndarymen birlesip onshaqty shara ótkizýdi josparlap otyrmyz. Olar eń aldymen qazaq tiliniń deńgeıin kóterý jáne óndiriske qajetti matematıka, fızıka, bıologııa, hımııa sııaqty mamandyqtar boıynsha ótpek. Óıtkeni joǵary oqý ornyn bitirgen mamandardyń kópshiligi mamandyq tańdaýdaǵy qatelikten óz salasy boıynsha jumys jasamaıdy. Al óndiriste jumys isteıtin mamandarǵa degen suranys joǵary», - deıdi «Qarasaı aýdanynyń bilim berý qory» korporatıvtik qorynyń dırektory Erkin Israılov. E.Dáýletulynyń sózine qaraǵanda, Germanııa sııaqty damyǵan elderde mektep bitirýshilerdiń 25 paıyzy ǵana joǵary bilim alady. Al ózgeleri kásiptik bilim berý mekemelerinde mamandyqtar ıgeredi. Bul eldiń damýyna óz yqpalyn tıgizip, ekonomıkany ustap turǵan sharýashylyqtardyń qajetti mamandarmen qamtamasyz etilýine kómegin tıgizedi. Al bizde jastarǵa durys baǵyt-baǵdar berý áli kúnge deıin kemshin túsip otyr.
