Almatyda pallıatıvti kómekti qaıdan alýǵa bolady
Basqarmanyń málimetinshe, pallıatıvti kómek degenimiz - mamandandyrylǵan emdeý múmkindigi shekteýli nemese taýsylǵan jaǵdaıda sozylmaly aýrýlardyń túrli nozologııalyq túrlerimen aýyratyn naýqastardyń ómir súrý sapasyn jaqsartýǵa arnalǵan densaýlyq saqtaý salasy.
Buǵan qaterli isik aýrýlary, baýyr aýrýy, tynys alý jáne júrek jetkiliksizdigi, ınsýlttan keıingi zardaptar, aýyr jaraqattar jatady.
Pallıatıvtik kómektiń negizgi mindeti – aýrýdy jeńildetý jáne aýrýdyń basqa da aýyr belgilerin azaıtý, medbıkelik kútim, patsıentterge jáne olarǵa kútim jasaıtyn jaqyndaryna qoldaý kórsetý.
«Pallıatıvti medıtsınalyq kómek qala turǵyndaryna tegin medıtsınalyq kómektiń kepildik berilgen kólemi sheńberinde qalalyq pallıatıvti kómek ortalyǵynda tegin kórsetiledi. Emdeý tirkelgen emhananyń joldamasymen josparly tártipte emdeýge jatqyzý bıýrosynyń portaly arqyly júzege asady», – dedi qoǵamdyq densaýlyq saqtaý basqarmasynyń emdeý-profılaktıkalyq qyzmet bóliminiń basshysy Laıla Imanǵalıeva.
Qalalyq pallıatıvti kómek ortalyǵy 170 tósek-orynǵa arnalǵan. Ortalyqta 5 bólimshe qyzmeti kórsetedi.
Sondaı-aq, pallıatıvti kómekti Almatynyń ortalyq qalalyq klınıkalyq aýrýhanasynan aqyly negizde alýǵa bolady.
Onda qazan aıynan bastap patsıentterdi uzaq emdeý bólimshesi ashylǵan.
«Pallıatıvti kómek sheńberinde qalalyq onkologııa ortalyǵynda emdelmeıtin qaterli isik dıagnozy bar adamdarǵa medıtsınalyq-psıhologııalyq kómek kórsetý boıynsha kóshpeli mobıldi brıgada jumys isteıdi. Onkologııalyq brıgada aýdandyq onkologtarmen tikeleı jumys istep, tegin kómek kórsetedi. Patsıentterdiń týystary men patsıentterdiń ózderi: 8 708 973 03 03 jedel jeli nómirine habarlasa alady» - dep habarlady Qoǵamdyq densaýlyq saqtaý basqarmasynyń baspasóz qyzmeti.