«Almatyda páktiginen aıyrylý» fılminiń prokattan alynýyna daýly oqıǵalardyń qatysy joq - «Arman» kınoteatrynyń dırektory
ASTANA. 12 sáýir. QazAqparat - Janna Isabaevanyń "Almatyda páktiginen aıyrylý" fılmi prokattan merziminen buryn alynyp tastaldy. «Arman» kınoortalyǵynyń atqarýshy dırektory Baýyrdan Shókenovtiń aıtýynsha, bul sheshim fılmniń kórsetilýi
kezinde týyndaǵan daý-damaılardyń saldary emes, dep habarlaıdy BNews.kz tilshisi.
«Almatyda páktiginen aıyrylý» fılmi keıbir kınoteatrlardyń prokatynan taza kommertsııalyq sebepterge baılanysty alynyp tastaldy. Mundaı sheshimdi dırektorlar keńesi qabyldaıdy jáne oǵan jekelegen adamdardyń tarapynan jasalǵan áreketter men qorqytýlar áser ete almaıdy», - dedi «Arman» kınoortalyǵynyń atqarýshy dırektory Baýyrdan Shókenov.
«Iıa, birqatar kınoteatrlarda fılm prokattan alynyp tastaldy, alaıda keıbirinde áli de júrip jatyr. Bul jıi kezdesetin qubylys», - dep atap ótti Shókenov.
Esterińizge sala keteıik, jaqynda ǵana Janna Isabaevanyń «Almatyda páktiginen aıyrylý» fılmi prokatqa shyqqan bolatyn. Rejısserdiń aıtýynsha, kartına avtordyń tájirıbelik jumysy bolyp tabylady.
