Almatyda patsıenti óltirgen dárigerge qatysty sot otyrysy ótti
Sot otyrysy onlaın rejımde ótti. Sottalýshy tergeý ızolıatorynan qatysty. Onyń barysynda polıtsııa departamentiniń patrýldik polıtsııa polkiniń qyzmetkeri men taksı júrgizýshisinen jábirlenýshi retinde jaýap alyndy. Almaty qalalyq ІІD Alataý aýdandyq patrýldik polıtsııa basqarmasynyń komandıri polıtsııa aǵa leıtenanty Omarhanov prokýrordyń suraqtaryna jaýap berdi. Ol dáriger qaza tapqan kúni, ıaǵnı 4 sáýirde qyzmette bolǵan. Tańǵy saǵat 09:40 shamasynda qalada «kúdiktini ustaý» jospary jarııalanǵan.
«Biz kúdikti otyrǵan kólikti ustaýǵa attandyq. «Sergek» bazasynyń málimeti boıynsha, kólik «Shynyraq» shaǵyn aýdanyna qaraı bet aldy. Barlyq ekıpaj sońynan erdik, kólik Ótemisov kóshesiniń boıyndaǵy bir úıdiń janynda toqtap tur eken. Men jáne úsh áriptesim ony ustadyq», - dedi tártip saqshysy. Onyń aıtýynsha, ustalǵan kezde kúdikti artqy oryndyqta tegis uńǵyly myltyqpen otyrǵan. «Ustaý kezinde kúdikti qarsylyq kórsetti. Ústine kıgen kúrteshesiniń qaltasynan ashana pyshaǵy túsip qaldy»,- deıdi ol. Sonymen qatar, sot barysynda taksı júrgizýshisi de sóıledi. Aıtýynsha, ol sol kúni saǵat 8:00-de áıelin jumysqa alyp barǵanyn, sodan keıin qosymsha arqyly tapsyrys qabyldaı bastaǵan. Klıentti Baıqadamov kóshesine aparyp tastap, kóligin turaqqa qoıyp jatqan kezinde qolyna qarý ustaǵan beıtanys er adam ruqsatsyz kóliginiń artqy oryndyǵyna otyryp, kólikti otaldyryp, júrgizýdi buıyrǵan.
«Ol maǵan myltyq kezep, kettik dedi. Men qorqyp, Baıqadamov kóshesiniń boıymen júrdim. Sodan keıin ál-Farabı-Saın-Rysqulovqa shyǵyp, «Shańyraq» yqshamaýdanyna qaraı bet aldyq. Polıtsııa bizdi sol jerde ustady», - dedi ol. Jábirlenýshi kúdiktiniń ózi qaıda barý kerektigin aıtyp otyrǵanyn jáne jolda telefonyn alyp emhanaǵa habarlasqanyn aıtty. «Maǵan dárigerdi óltirgenin aıtyp, keıin 30 myń teńge berdi»,- deıdi kýáger.
Buǵan deıin ıÝrıı Shýmkovtyń ólimine qatysty istiń sotqa joldanǵany týraly jazǵan edik.
Bıylǵy 4 sáýir kúni Almatyda dáriger emdelýshi patsıentiniń qolynan qaza tapty. Ony kúdikti ańshy myltyǵymen atyp tastaǵan. Asa aýyr qylmys qalanyń Bostandyq aýdanynda bolǵan. Kúdikti qalada engizilgen arnaıy jospar barysynda Alataý aýdany aýmaǵynda ustaldy. Keıin QR Densaýlyq saqtaý mınıstri Ajar Ǵınııat ıÝrıı Shýmkov pen patsıent arasynda qandaı da bir janjal bolmaǵanyn aıtty.