Almatyda ózine pyshaq salǵan er adamnyń jaǵdaıy aýyr

ALMATY. QazAqparat - Almatyda kólik urlap, ustaý kezinde ózine pyshaq salǵan er adam aýrýhanaǵa aýyr hálde tústi. Bul týraly qalalyq Qoǵamdyq densaýlyq saqtaý basqarmasy málim etti, dep habarlaıdy QazAqparat tilshisi.

«Naýqas №7 qalalyq klınıkalyq aýrýhanaǵa moıyn jáne ish aımaǵyndaǵy jaraqatpen aýyr halde tústi. Saǵat 15:30-daǵy jaǵdaı boıynsha, naýqasqa ota jasalyp jatyr»,- dep habarlady Almaty qalalyq Qoǵamdyq densaýlyq saqtaý basqarmasynyń baspasóz qyzmeti.
Buǵan deıin Almaty qalalyq Polıtsııa departamenti «Aqsaı» yqshamaýdanynda er adam kólik urlap, jol apatyna túskeni týraly málimdegen bolatyn.
Ony ustamaq bolǵan kezde kúdikti ózine pyshaq suǵyp alǵan.
Áleýmettik jelide er adamnyń jerde qansyrap jatqan vıdeosy tarady.