Almatyda ózine qol salmaq bolǵan áıel qutqaryldy
ALMATY. QazAqparat - Almatylyq polıtseıler kópirden sekirip ólmek bolǵan áıeldi ajaldan arashalap qaldy. Oqıǵa búgin 23 sáýir túski saǵat 11:30 shamasynda bolǵan, dep habarlaıdy QazAqparat tilshisi.
Almaty qalalyq Polıtsııa departamentiniń málimetinshe, 43 jastaǵy áıel ózin-ózi óltirmek boldy. Ol ál-Farabı dańǵyly men Hodjanov kóshesiniń qıylysynda ornalasqan jaıaý júrginshiler kópiriniń qorshaýynan shyǵyp, sekirýge árekettengen.
Polıtsııa qyzmetkerleri onyń sekirýine jol bermedi.
«Biz saǵat 11:30-dar shamasynda ekıpaj quramynda dańǵyl boıymen júrdik, kópirde turǵan áıeldiń qorshaýdyń arǵy betine shyqqanyn baıqap qaldyq. Birdeneniń durys emes ekendigine kúdiktendik. Aldymen men oǵan júgirip bardym. Birneshe sekýndtyń ishinde men áıelge jaqyndap baryp, ony ustap aldym. Sodan keıin meniń áriptesim, polıtseı Ermek Meńǵalıev keldi. Beıtanys áıeldiń sekirýge tyrysqanyna qaramastan, biz ony shyǵaryp aldyq. Keıin áıel adam qatty jylady, tipti, ol bizge mas bolyp kórindi. Onyń jaǵdaıyn eskere otyryp, biz ony suraqtarmen mazalaǵan joqpyz, mán-jaıdy túsindirý úshin ony Bostandyq aýdandyq oolıtsııa basqarmasyna apardyq, – dedi Almaty qalalyq PD JPQB mamandandyrylǵan batalonynyń aǵa ınspektory Ernur Tilektes.
