Almatyda ózge ult ókilderiniń 70 paıyzdan astamy memlekettik tildi biledi nemese túsinedi - qala ákimi
ALMATY. Qyrkúıektiń 23-i. QazAqparat /Erlik Erjanuly/ - "Almaty qalasyndaǵy tildik ahýal jyl ótken saıyn ózgerip keledi. Arnaıy júrgizilgen áleýmettik zertteýlerdiń nátıjelerine súıensek qazir qala turǵyndarynyń 90 paıyzy memlekettik tildi bilýdi asa mańyzdy mindeti sanaıdy". Ony qala ákimi Ahmetjan Esimov keshe "Ana tilim - ardaǵym" dep atalatyn festıvaldiń ashylý rásiminde aıtty, dep habparlaıdy QazAqparat.
"Memlekettik til saıasatyn júzege asyrýda qalamyzdyń orny erekshe ekeni bárimizge belgili. Almatyda qazaq tilin oqyp-úırenýge, is-qaǵazdaryn júrgizýge tolyq jaǵdaı jasalǵan. Oǵan jergilikti bıýdjetten jetkilikti qarajat ta bólinip otyr. Bul turǵyda qalamyz respýblıkamyzda árqashan da aldyńǵy qatarda tabylyp keledi. Barlyq ult ókilderiniń memlekettik tilge degen qurmeti kún ótken saıyn arta túsýde ", deıdi Ahmetjan Smaǵululy. Qala ákiminiń aıtýynsha, Almatyda qazaq balabaqshalary men mektepteriniń sany da jyl ótken saıyn artyp keledi. Máselen 1989 jyly qalada qazaq mektepteriniń sany jeteý bolsa, 5 jyl buryn - 35, qazir - 50 qazaq, 53 aralas mektep jumys isteýde. Sondaı-aq 1989 jyly qazaq mektepterinde 8 myń bala oqysa, 2005 jyly 60 myń, al 2010 jyly 70 myńnan asty.
"Sońǵy jyldary salynǵan mektepterdiń barlyǵy qazaq mektepteri bop ashylyp jatyr. Demek qazaq tilinde bilim berý san ǵana emes, sapa jaǵynan da jetilip keledi degen sóz. Naqty zertteýlerge súıensek qalamyzdaǵy ózge ult ókilderiniń 70 paıyzdan astamy memlekettik tildi biletinin nemese túsinetinin kórsetken. Bul birtindep qazaq tilindegi ortanyń qalyptasyp kele jatqandyǵynyń dáleli. Almatylyqtardyń 74 paıyzy elimizde júrgizilip jatqan til saıasatyna kóńilderi tolatynyn tanytqan", deıdi A. Esimov.
