Almatyda ózennen úıine sý tartqan turǵyndarǵa aıyppul salyndy
ALMATY. QazAqparat – Almaty turǵyndary Úlken Almaty ózeniniń sýyn úıine zańsyz tartyp alǵan adamdarǵa qatysty shaǵymdandy, dep habarlaıdy QazAqparat tilshisi.
«Biz bul máseleni bilemiz. Arnaıy qurylǵan komıssııanyń tekserýi nátıjesinde 4 otbasy Úlken Almaty ózenine sorǵysh ornatyp úıine sý alyp otyrǵany anyqtaldy. Ekologııalyq ınspektsııa olarǵa aıyppul saldy. Jergilikti ózin ózi basqarý komıtetiniń tóraǵasy kúndelikti tekserýge shyǵyp júr», - dedi onlaın brıfıng barysynda Bostandyq aýdany ákiminiń orynbasary Serik Ádilbaev.
Buǵan deıin áleýmettik jelide ózen jaǵasynda turatyn keıbir turǵyndardyń sý soratyn arnaıy elektr qurylǵylaryn ornatyp alǵany týraly jazba jarııalanǵan bolatyn.
Olardyń aıtýynsha, bul birinshi kezekte balalar úshin qaýip týdyrady.
Sonymen qatar, BAQ betterinde Úlken Almaty ózeninde tok soǵyp ólgen ıt týraly da jazylǵan bolatyn.
