Almatyda ózen jaǵalaýynda ornalasqan úı turǵyndary ýaqytsha qaýipsiz jerge kóshiriledi
ALMATY. QazAqparat - Almatyda ózen jaǵalaýynda ornalasqan úılerdiń turǵyndary qaýipsiz jerge ýaqytsha kóshiriledi. Mundaı qaýipsizdik sharalary 1 mamyrda oryn alǵan tótenshe jaǵdaıdan keıin qolǵa alynyp otyr.
Aıta ketý kerek, tolassyz jaýǵan jaýyn kesirinen Esentaı ózeniniń jaǵalýynda ornalasqan jekemenshik úıdiń monshasy ózenge qulap ketken bolatyn.
Oqıǵa ornyna «Qazseldenqorǵaý» MM, TJD, ákimdik ókilderi shyqty.
Mamandardyń aıtýynsha, qulaǵan taldar ózen arnasyn bitep qalǵan. Saldarynan sý deńgeıi kóterilip, ǵımarat qulady.
Qalalyq TJD qaýipti aýdanda ornalasqan birneshe úıdiń ıelerine ýaqytsha qaýipsiz jerge kóshýge keńes berdi.
Aýa raıyn boljaýshylar jaqyn kúnderi jaýyn-shashynnyń kóp túsýi yqtımal dep otyr. Osyǵan baılanysty mamandar ózen arnasynyń opyrylý qaýpi áli de joǵary ekendigin eskertip jatyr.
