Almatyda ózdiginen qozǵalyp ketken avtobýs qorshaýǵa soǵyldy
ALMATY. QazAqparat - Almatyda júrgizýshisi qol tejegishin tartýdy umytyp ketken avtobýs abaısyzda júrip ketti, dep habarlaıdy QazAqparat tilshisi.
Qoǵamdyq kólik ózdiginen qozǵala kele Gornyı gıgant shaǵyn aýdanyndaǵy Jamaqaev kóshesindegi №202 úıdiń qorshaýyn qıratyp toqtaǵan.
№70 avtobýs júrgizýshisiniń aıtýynsha, ol sońǵy aıaldamaǵa toqtap, kólikti óshirip syrtqa shyǵyp ketken. Kóp uzamaı-aq, avtobýs ózdiginen eńiske qaraı quldılaı jónelgen.
Júrgizýshisi kóliktiń qol tejegishin tartýdy umytyp ketkenin moıyndady. Abyroı bolǵanda, kóshede júrginshiler bolmaǵan. Sol sebepti eshkim zardap shekpedi. 
