Almatyda Ózbekstan azamatshasy azamattyq nekedegi óz kúıeýin óltirdi
ALMATY. 6 aqpan. QazAqparat /Názıra Eleýhan/ - Almatyda azamattyq nekede birge turyp jatqan áıeli kúıeýin pyshaqtap óltirdi, dep habarlaıdy Almaty qalasy ІІD baspasóz qyzmeti.
Baspasóz qyzmetiniń habarlaýynsha, oqıǵa Jetisý aýdanynda oryn alǵan. Azamattyq kúıeýi kúnde áıelin uryp soqqan, bul joly oǵan shydaı almaǵan 20 jastaǵy áıeli kúıeýiniń keýdesine pyshaq salǵan. Júrek tusyna tıgen pyshaq soqqysynan jábir kórsetýshi sol mezette kóz jumǵan.
«Jas otbasy jer úıdi jaldap turyp jatqan. Úıdiń ıesiniń aıtýynsha, olar tynysh otbasy bolǵan, ishimdik ishpegen, tańerteń Ortalyq bazarǵa jumystaryna ketip, keshke kelgen. Biraq, onyń barlyǵy olaı bolyp shyqpaǵan. Áıeli kúnde kúıeýinen taıaq jep júrgen, biraq ol týraly eshkimge tys jarmaı, ishinde saqtap júre bergen. Senbi kúni keshkisin kúıeýi ádetine basyp taǵy urýdy bastaǵanda, áıeli shydaı almaı pyshaqty kúıeýiniń keýdesine salǵan. Bir qyzyǵy, bul týraly aqparatty polıtsııaǵa áıeldiń ózi habarlap, páterge qaraqshylyq shabýyl jasaldy degen. Alaıda, onyń qylmystan jaltarý oıy iske aspady. Birinshiden ol, qaraqshylyq shabýyl jasaldy dep aryz aıtyp, biraq olar eshnárseni áketpedi dedi, ekinshiden, qaraqshylardyń nege saǵan tıispedi degen suraǵyna esh jaýap aıta almady. Uzaq ýaqyt qylmysty moıyndaǵysy kelmegen qyz, eki saǵattan soń, shydaı almaı jylap, qalaı bolǵandyǵyn baıandap berdi. Ol bul qylmystyń oǵan degen ashý-yzadan týyndaǵanyn aıtyp aqtaldy. Degenmen, onyń qylmysyna sot úkim shyǵaratyn bolady», - dedi Almaty qalasy ІІD jeke tulǵaǵa qatysty qylmystardy ashý bóliminiń bastyǵy, polıtsııa podpolkovnıgi Sabyrjan Jurabekov.
Onyń aıtýynsha, Ózbekstan azamatshasy azamattyq kúıeýimen bir jarym jyl buryn Almatyda tanysyp, sol ýaqyttan beri Almaty qalasy bazarlarynyń birinde taýarlar satyp kelgen.
Qazirgi tańda áıel adam ýaqytsha qamaý abaqtysyna qamaldy. Onyń ústinen qylmystyq is qozǵaldy.
