Almatyda oıynshyq mashınaǵa minip, kóshe aralaǵan júrgizýshi jazalana ma
ALMATY. QazAqparat - Almatyda balalardyń elektromobılin tizgindep, qala kóshelerin aralaǵan jigit jaýapkershilikke tartylmaıtyn boldy, dep habarlaıdy QazAqparat tilshisi. Bul týraly qalalyq polıtsııa departamentiniń resmı ókili Saltanat Ázirbek aıtty.
Vıdeo Іnstagram-daǵy ZTB pablıginde jarııalandy. Jeli qoldanýshylary júrgizýshiniń birneshe ret «ereje buzǵanyn» baıqap qalǵan. Atap aıtqanda, «júrgizýshi» memlekettik nómirsiz, qaýipsizdik beldigin taqpaı júrgen. Kóshege burylatyn tusynyń faryn jaqpaı shyqqan.
Polıtsııa bul vıdeony zerttep shyqty.
«Onyń áreketinde quqyqbuzýshylyq quramy joq. Oǵan zań boıynsha jaýapkershilik qarastyrylmaǵan. Biraq, kólik jıi júretin iri kóshege oıynshyq mashınamen shyǵý - adam ómiri men densaýlyǵy úshin qaýipti. Bul jigit basqalardyń ómiri úshin de alańdaýy tıis», - dedi qalalyq PD resmı ókili Saltanat Ázirbek.
Sonymen qatar, polıtsııa rolıkti túsirgen avtordy izdegen joq. Sebebi, onyń da áreketinde zań buzatyn eshteńe joq.
