Almatyda oıyn-saýyq ortalyǵyn jaryp jibermek bolǵan qylmysker sottaldy

ALMATY. QazAqparat - Almaty qalasy Almaly aýdandyq qylmystyq soty A.J. Bitimbaevty terrorızm aktisine daıyndalý, terrorızmdi nasıhattaý, dinı alaýyzdyqty qozdyrý jáne atys qarýyn zańsyz saqtaý faktileri boıynsha 10 jylǵa sottady. Úkim zańdy kúshine endi, dep habarlaıdy QazAqparat Ulttyq qaýipsizdik komıtetiniń baspasóz qyzmetine silteme jasap.

Ol UQK nazaryna destrýktıvti dinı ıdeologııany ustanýshy jáne Qazaqstan Respýblıkasynda tyıym salynǵan «DAISh» halyqaralyq terrorıstik uıymynyń jaqtasy retinde ilikti.

«Tekserý barysynda onyń Internette «DAISh» úgit-nasıhatynyń yqpalymen halyq kóp shoǵyrlanǵan oryndarda jarylǵyshty paıdalanyp, teraktiler daıyndaýy týraly aqparat alyndy. Qarýly shabýyl jasaǵannan keıin ol shetel sodyrlarynyń qataryna ótý jáne terrorıstik áreketin jalǵastyrý úshin Sırııaǵa jetýdi josparlaǵan. Ol bıylǵy sáýirde Almatyda ishki ister organdaryn tarta otyryp, UQK kúshimen ustaldy» delingen habarlamada.

Tintý kezinde odan atys qarýy men travmatıkalyq qarý, qoldan jasalatyn jarylǵysh quraldar jasaýǵa arnalǵan quramdas bólshekter, úsh saýda-oıyn-saýyq ortalyǵynyń syzbalary, betperde men qolǵap alyndy.

Bitimbaevtyń kinási kýágerlik túsiniktermen, zattaı jáne ózge de aıǵaqtarmen tolyq dáleldendi.