Almatyda oıyn alańynda 41 jastaǵy áıel kishkentaı balany soqqyǵa jyqty
ALMATY. QazAqparat - Almatyda balalar oıyn alańynda bir áıel balany soqqyǵa jyqty, dep habarlaıdy QazAqparat tilshisi.
Oqıǵa 6 shilde kúni Almaty qalasy Bostandyq aýdanyndaǵy «Naýryz» turǵyn úı kesheniniń aýlasynda bolǵan.
«Oıyn alańynda 1980 jyly týǵan áıel 8 jasar balany uryp tastady. Ol onyń qabyrǵasynan, basynan, keýdesinen uryp, býyndyrdy. Kórshileri áreń ajyratty. Sodan keıin ol balany qorǵaǵan áıelderge tap berdi»,- dep jazdy Facebook qoldanýshysy Janna Ahmetova.
Polıtsııa departamenti atalǵan derektiń tirkelgenin málim etti.
«Bul másele nazarda. Barlyq qatysýshylar búgin shaqyrylady. Tıisti saraptamalar taǵaıyndalady, olardyń nátıjesi boıynsha sharalar qabyldanady», - dedi Bostandyq aýdandyq polıtsııa basqarmasynyń bastyǵy Dýman Aýhadıev.
